Eston, grek, kamchadal: Ulttyq ulan qatarynda 30-dan astam ult ókili qyzmet etedi
ASTANA. KAZINFORM – Quqyqtyq tártip áskeri qatarynda jaýyngerlik qyzmet atqaratyn ózge ult ókilderi jıi kezdesedi. Kósh basyn orys, ózbek jáne tatar ultynyń ókilderi bastap tursa, tizimdi eston, grek, kamchadal sekildi etnos ókilderi túıindeıdi.
Byltyrǵy jeltoqsan aıynyń ózinde Pavlodar qalasynda ornalasqan 5512 áskerı bólimine kelip qosylǵan sarbazdardyń arasynda káris, ıran, ázerbaıjan, uıǵyr jáne kúrd halqynyń ókilderi boldy. Olardyń bári – Qazaqstan azamattary. Sondyqtan ózge ult ókili bolsa da elimizde turǵan soń qoldaryna qarý alyp, Otan qorǵaýǵa kelip otyr.
Mysaly, atalǵan áskerı bólimniń 5 oqý vzvody 1 bólimshesiniń sarbaz atqyshy qatardaǵy Alekseı Han Qyzylorda qalasynda ómirge kelgen. Mektep bitirgennen keıin ol Qytaı Halyq Respbýlıkasynyń Nanchang ýnıversıtetinde kompıýterlik baǵdarlamashy mamandyǵy boıynsha bilim alǵan. Álemniń birneshe elin aralaǵan ol Ońtústik Koreıada bir jylǵa jýyq jumys istep, Astana qalasyna oralǵan kezde áskerge shaqyrylǵan.
– 2024 jyldyń jeltoqsan aıynda Ulttyq ulan sapyna alyndym. Ázirge jaýyngerlik oqý kýrsynan ótip jatyrmyz. Munda bizdi áskerı tártipke baýlyp, saptyq júriske úıretti. Jaqyn kúnderi áskerı ant qabyldaımyz, - dedi Alekseı Vladıslavovıch.
Áskerge qosylǵanyna kóp bolmasa da jas jaýynger qyzmettiń qyr-syryn úırenýge baryn salyp júr. Azǵantaı ýaqyttyń ishinde qarýlastarymen etene aralasyp, bir úıdiń balalaryndaı bolyp alǵan. Áskerı bólimdegi jaýyngerlik baýyrmaldyqtyń erekshe ekenin onyń qarýlasy Rahım Shıralıev te rastap otyr. 18 jastaǵy ırandyq Rahım Jamalovıch Shymkent qalasynyń týmasy. Alaıda ol Óskemen qalasynda er jetken. Ol da ásker qataryna jaqynda qosylǵan.
– Shyǵys Qazaqstan oblysynyń ortalyǵynda otbasymyzben qurylyspen shuǵyldanamyz. Mektepten keıin kolledjde qurylysshy mamandyǵyn alyp shyqqanmyn. Al qazir Otan aldyndaǵy boryshymdy ótep júrmin. Komandırlerimiz bizderge qamqorlyq tanytyp, áskerı salaǵa úıretýde. Óz basym, Ulttyq ulan áskerine kelgenim úshin qýanyshtymyn, - dedi qatardaǵy Rahım Shıralıev.
Aıta keteıik, Qazaqstan Respýblıkasy Strategııalyq josparlaý jáne reformalar agenttigi Ulttyq statıstıka bıýrosynyń 2024 jylǵy 22 sáýirdegi esebi boıynsha qazaqstanda 90-nan astam etnos ókilderi mekendeıdi. Al búginde olardyń 30-ǵa jýyǵy Ulttyq ulan áskeri qatarynda qyzmet atqaryp júr.