Estelik baǵy: Elordalyq oqýshylar ata-analarymen birge aǵash otyrǵyzdy
Naýqan aıasynda balalar ata-analarymen birge mektep aýmaǵyna aǵash otyrǵyzdy.
«Jastar arasynda otbasylyq qundylyqtardy nyǵaıtý sharalaryn ınstıtýtsıonalızatsııalaý» jobasy aıasynda №59 mektep-lıtseıde aǵash otyrǵyzý aktsııasy júrip jatyr. Munda kóptegen otbasylar berik kúshtiń, dostyq pen birliktiń sımvoly retinde birlesip aǵash egedi. Naýqan búkil Qazaqstan boıynsha ótedi, bizdi kóptegen mektepter, kolledjder jáne ákimdikter qoldap otyr. 15 mamyrdan bastap Almaty ákimdigimen osyndaı aktsııa uıymdastyramyz Búgin osy mektep aýmaǵynda 20-dan astam kóshet otyrǵyzyldy», - dedi «Eń baqytty el» qoǵamdyq qorynyń jetekshisi Kamıla Súleımenova.
Qoǵamdyq qor basshysynyń aıtýynsha, aǵash otyrǵyzý balalarǵa qorshaǵan ortaǵa qamqorlyq jasaýdy úıretetin, otbasymen birge ýaqyt ótkizýge, fılm kórýge ǵana emes, birge aǵash otyrǵyzýǵa, bir-birine kómektesýge múmkindik beretin biriktirýshi faktor bolady.
«Bizdiń qyzmetimiz otbasylyq dástúrlerdi jańǵyrtýǵa jáne nyǵaıtýǵa baǵyttalǵan. Sonymen birge, biz qalany kógaldandyrýǵa kómektesemiz. Eger Qazaqstannyń barlyq óńirlerinde otbasylyq alleıalar gúldense, qalalar osylaı ózgerse, biz qýanamyz», - deıdi K. Súleımenova.
Aǵash egý dástúri №59 mektep-lıtseıde jyl saıyn júrgiziledi. Muǵalimderdiń aıtýynsha, qatysýshy otbasylar sany da jyldan-jylǵa artyp keledi.
«Bizdiń ulymyz Álibı bıyl 11-synypty bitiredi. Búgin biz túlekter esteligi retinde aǵash otyrǵyzýǵa keldik jáne Otbasy kúni qarsańynda óz birligimizdi kórsetýdi uıǵardyq. Osylaısha, biz alǵan bilimimiz úshin mektebimizge alǵys bildirgimiz keldi. Bolashaqta mektep janynda serýendep, nemerelerimizge mektep aýmaǵyn kógaldandyrýǵa úles qosqanymyzdy kórsetemiz. Bul mektepke jaqynda ǵana aýysqandyqtan, aktsııaǵa alǵash ret qatysyp turmyz», - dedi Álibıdiń ata-anasy Aına jáne Qaıyrbolat Quspekovtar.
