Essentsıale Forte N bos kapsýlada ótkizilip jatqandyǵy týraly aqparat shyndyqqa janaspaıdy - QR DSÁDM

ASTANA. QazAqparat - Germanııadaǵy Sanofi kompanııasynda jasalatyn Essentsıale Forte N preparatynyń bos kapsýlada ótkizilýi týraly áleýmettik jeliler, messendjerler arqyly taratylǵan aqparat shyndyqqa janaspaıdy.

Bul týraly QR Densaýlyq saqtaý jáne áleýmettik damý mınıstrligi baspasóz qyzmetinen habarlandy.

«Kapsýlada untaqtalǵan zat bar dep oılaıtyn tutynýshylar qatelesedi. Nusqaýda kórsetilgen preparattyń sıpattamasyna sáıkes, kapsýlada pasta tárizdes qospa bolady. Dárilik zatty kórý úshin kapsýlany ashyp, onyń syrtqy qaptamasyn syǵý kerek. Atalǵan dárilik zat Qazaqstanda tirkelip, medıtsınalyq qoldanýǵa ruqsat berilgen»,-delingen vedomstvo málimetinde.

Ortalyq Azııa jáne Kavkaz aımaǵyndaǵy Sanofi kompanııasynyń qaýipsizdik jónindegi dırektory Denıs Astanınniń aıtýynsha, Qazaqstanda atalǵan preparattyń jalǵan túrin qoldanýdyń birde bir jaǵdaıy tirkelmegen.

«Áleýmettik jelilerdegi shyndyqqa janaspaıtyn beınejazbalardyń paıda bolý sebebi - halyqtyń dárilik zattardy durys qoldaný jóninde habardarlyǵynyń azdyǵy. Eger de tutynýshylardyń preparatqa degen kúdigi, narazylyǵy bolǵan jaǵdaıda, olar óndirýshige habarlasa alady. Onyń baılanys quraldary nusqaýlyqta kórsetilýi tıis. Sonymen birge, Sanofi kompanııasynyń Qazaqstandaǵy ókildiginde dáriniń sapasy, keri áser etý joldary, dáriniń jalǵandyǵy boıynsha kez kelgen suraqtar boıynsha keńes beretin jedel telefon jelisi jumys isteıdi. Onyń nómiri [phone]», - dedi ol.

QR Densaýlyq saqtaý jáne áleýmettik damý mınıstrligi kez kelgen preparatty qoldanar aldynda nusqaýlyqpen tanysýdy, dárilik zattyń onyń sıpattamasymen sáıkes ekendigine kóz jetkizýge keńes beredi. Dárilik zat týraly, onyń keri áseri, qoldaný tásili, qarsy kórsetilimderi týraly barlyq aqparat kórsetilgen nusqaýlyqty ony qoldaný kezindegi 1 aıdyń kóleminde saqtaǵan jón.