Esirtkiniń ınternet arqyly taralý jolyn kesetin sharalar ázirlenedi
ASTANA. KAZINFORM – Internet-resýrstar arqyly esirtkiniń taralý jolyn kesý boıynsha qosymsha sharalar kesheni ázirlenedi. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«2023 jyly ІІM esirtki saıttaryn jedel izdeý, olardy paıdalanýshylar men ákimshilerdi anyqtaý úshin 21 apparattyq-baǵdarlamalyq keshen jáne basqa da tehnıkalyq quraldar satyp aldy. Bıyl Telegram onlaın-platformasynda esirtki satatyn 24 ınternet-dúken jáne jalpy aýdıtorııasy 50 myńnan asatyn 12 jarnamalyq bot joıyldy», - delingen Úkimet basshysynyń jaýabynda.
Oljas Bektenovtiń dereginshe, Premer-Mınıstrdiń orynbasary Tamara Dúısenovanyń úılestirýimen Іshki ister mınıstrliginde jumys toby qurylǵan.
«Onyń aıasynda nashaqorlyqtyń aldyn alý jáne esirtkige baılanysty qylmysqa qarsy is-qımyl, sonymen qatar áleýmettik jáne basqa ınternet-resýrstar arqyly esirtkiniń taralý jolyn kesý boıynsha qosymsha sharalar kesheni ázirlenetin bolady», - dedi ol.
