Esirtkimen kúreste polıtsııaǵa kómektesken kúdikti jastardy jaýapkershilikten bosatý usynyldy
Esirtki zerthanalaryn uıymdastyrǵany úshin jazany kúsheıtý týraly zańnamaǵa túzetýler ázirlendi. Bul týraly Májiliste esirtki qylmysyna qarsy is-qımyl taqyrybyndaǵy Úkimet saǵatynda Іshki ister mınıstri Erjan Sadenov aıtty, dep habarlaıdy Kazinform.
«Bıyl 4 transulttyq uıymdasqan qylmystyq topty joıdyq. Bul toptardaǵy 14 adam qylmystyq jaýapkershilikke tartyldy, olardyń ishinde 13 -i shetel azamaty. Olardan shamamen 100 keli «sıntetıka», 85 tonnadan astam prekýrsor, 13 reaktor jáne 1 myńnan astam zerthanalyq qural-jabdyq tárkilendi», - dedi E. Sadenov.
Onyń aıtýynsha, quqyq qorǵaý jáne arnaıy organdar jalpy 75 jasyryn esirtki zerthanasyn joıdy. 100 tonnadan astam prekýrsor tárkilendi. 8 tonnadan astam daıyn zattar óndirisiniń joly kesildi. Bul óz kezeginde shamamen 25 mln bir rettik doza jáne myńdaǵan aman qalǵan adamdardyń ómiri. Óıtkeni «sıntetıkalyq esirtki» birden táýeldilikke ákep soqtyrady jáne densaýlyqty qurtady. Osylaısha prekýrsorlardy jáne zerthanalyq qural-jabdyqty zańsyz jetkizýdiń jolyn kesý - tıimdi profılaktıkalyq shara sanalady.
«Sıntetıkalyq esirtkini óndirýmen baılanysty qaýip-qaterdi eskere otyryp, esirtki zerthanalaryn uıymdastyrǵany úshin jazany kúsheıtý týraly zańnamaǵa túzetýler ázirlendi. Qazir esirtki zerthanalaryn uıymdastyrýshylar «esirtkini ótkizý maqsatynda bir top adammen jáne asa iri kólemde ázirlegeni ári qaıta óńdegeni úshin jaýapkershilikke tartylady. Sanktsııasy - 10 jyldan 15 jylǵa deıin bas bostandyǵynan aıyrý. Usynylatyn túzetýlerde osy áreketter 15 jyldan 20 jylǵa deıin nemese ómir boıy bas bostandyǵynan aıyrý jazasymen QK 297-babynyń 4-bóligi boıynsha dárejelenetin bolady. Sonymen qatar, qoǵamda esirtki «jasyrýshylarǵa» arnalǵan jazalaýdyń tym qatańdyǵy týraly másele kóterilip jatyr. Bul qylmystarǵa jastar men jasóspirimder jıi tartylyp jatyr. Shynymen, esirtki ótkizýshiniń «portreti» ózgergen. Olar úshin ınternet-tehnologııalaryn belsendi paıdalaný úırenshikti jaǵdaı», - dedi mınıstr.
Onyń sózine qaraǵanda, qazir 6 kámeletke tolmaǵan sottaldy. Taǵy 26 jasóspirim jaýapkershilikke tartylyp jatyr.
«Bul rette biz tıisti túzetýlerdi ázirledik. Eger qylmys birinshi ret jasalsa, sondaı-aq kináli adam tergeý organdarymen belsendi yntymaqtastyqta bolsa, esirtki ótkizýshilerdi jaýapkershilikten bosatý múmkindigi qarastyrylady. Múmkindikti paıdalana otyryp, Májilis depýtattaryn osy túzetýlerdi zań jobasy aıasynda qarastyrýdy suraımyn», - dedi vedomsıvo basshysy.
