Esirtkimen kúres: Qazaqstanda 125 myń sheteldik tólem kartasy buǵattaldy
ASTANA. KAZINFORM – Іshki ister mınıstrligi esirtki qylmysyna qarsy kúresti júrgizip jatyr. Osy baǵytta qazirgi tańda elimizde 125 myńǵa jýyq sheteldik tólem kartasy buǵattalyp, 20 myń krıptoámııan tekserilý ústinde, - dep habarlaıdy Polisia.kz.
Іshki ister organdary taratqan málimetterge qaraǵanda, 2026 jyldyń bes aıynda úsh myńnan astam esirtkige qatysty quqyq buzýshylyqtyń joly kesildi, onyń ishinde shamamen 1,5 myń esirtki qylmysy anyqtaldy. Sonymen qatar alty uıymdasqan qylmystyq toptyń, onyń ishinde bir transulttyq toptyń qyzmeti toqtatyldy. Sıntetıkalyq esirtki óndiretin 12 zerthana jáne 42 fıtozerthana joıyldy. 12 myńǵa jýyq zańsyz onlaın-resýrs buǵattaýǵa jiberildi.
Ulttyq bankpen birlesip, esirtki bıznesine qatysty qarjylyq operatsııalarǵa tosqaýyl qoıylyp jatyr. Nátıjesinde 107 mıllıon teńgeden astam kúmándi qarjy aýdarymy toqtatyldy. 125 myńǵa jýyq sheteldik tólem kartasy buǵattaldy. Sondaı-aq 20 myń krıptoámııan tekserilip jatyr.
Úlken qaýiptiń biri - sıntetıkalyq esirtkiler. Zańsyz aınalymnan 466 kılogramm sıntetıkalyq esirtki jáne 11 tonnadan astam prekýrsor tárkilendi.
Aldyn alý jumystary da júrip jatyr. Jyl basynan beri mektepter men joǵary oqý oryndarynda 6,5 myńnan astam esirtkige qarsy is-shara ótkizildi. Segiz myńnan astam aqparattyq materıal jarııalandy. Halyqaralyq yntymaqtastyq damyp keledi. Qazaqstan sheteldik áriptesterimen birlesip, transulttyq esirtki qylmysyna tosqaýyl qoıyp jatyr.
- Qoǵamdyq qaýipsizdikti nyǵaıtý, azamattardyń densaýlyǵyn qorǵaý jáne jas urpaqtyń bolashaǵyn saqtaý maqsatynda esirtki qylmysyna qarsy keshendi jumystar jalǵasatyn bolady, - dedi ІІM esirtki qylmysyna qarsy is-qımyl komıteti tóraǵasynyń orynbasary Eldar Ábdikenov.
Osyǵan deıin Mańǵystaýda iri esirtki jetkizý arnasy joıylǵany týraly jazdyq.
