Esirtkige táýeldilikten arylý joly qandaı — narkolog jaýaby
ASTANA. KAZINFORM — Qalalyq psıhıkalyq densaýlyq ortalyǵynyń dáriger-psıhıatry, narkolog Toqtar Tóleýhanuly esirtkige táýeldi adamdy emdeý jumysy qalaı júrgiziletinin baıandap berdi.
— Esirtkige táýeldiliktiń úsh satysy bar: bastapqy, damyǵan jáne sońǵy. Alǵashqy ekeýinde emdeý múmkindigi joǵary. Al úshinshi satyǵa ótip ketse, onda naýqastyń betin beri qaratý qıyn. Óıtkeni, toksıkalyq ýly zattar saldarynan júıke jasýshalary ólip, mı organıkalyq turǵyda zaqymdalady, ıaǵnı entsefalopatııaǵa ushyraıdy. Mundaı jaǵdaıda adam aqyl-esinen de aljasady. Sondyqtan nashaqordyń týystary ony arnaıy ortalyqqa, mamandardyń qaraýyna barynsha erterek ákelgeni jón, — deıdi ol.
Áıtse de, narkolog «Emdelý eshqashan kesh emes» dep úmit úzbeýge shaqyrady. Nashaqor esirtkige qanshalyqty táýeldi bolsa da, kúder úzbeı, «uıyqtan» shyǵyp, qalypty ómirge oralý úshin kúreskeni abzal.
Sonymen birge, Astanadaǵy qalalyq psıhıkalyq densaýlyq ortalyǵynda naýqastarǵa ambýlatorııalyq jáne statsıonarlyq kómek kórsetiledi. Statsıonarlyq emdeý kýrsy shamamen 45 kúnge sozylady, ıaǵnı bir jarym aı aýrýhanada jatady.
Aldymen, naýqas dári-dármekpen emdelip, psıhologııalyq, fızıologııalyq, dárýmendik em alady. Qany ýly, toksıkalyq zattardan tazartylady. Sodan soń, psıhoterapııa bastalady, ıaǵnı esirtkige táýeldi adamnyń em-domǵa, týystarynyń qoldaýyna degen oń kózqarasyn qalyptastyrýǵa kúsh salynady. Psıhoterapııada toppen jumysqa mán beriledi, ıakı naýqastar arnaıy kýrstardan birge ótedi.
— 45 kún statsıonarlyq em aıaqtalǵan soń, biz onymen tolyq qoshtaspaımyz. Naýqas jıi-jıi kelip otyrady. Ary qaraı ońaltý sharalaryn jalǵastyramyz. Emotsıonaldyq jaǵdaıy qalpyna kelgenshe, kúızelisten shyǵaratyn, uıqysyn qalpyna keltiretin em-dom usynamyz. Naýqas bastapqyda aıyna birneshe ret, keıin 2-3 aıda bir, sosyn jarty jylda bir keledi. Mamandardyń kómegi qajet bolǵanda, ortalyqqa júginedi, — deıdi Toqtar Tóleýhanuly.
Sonymen qatar, ortalyqta bir ýaqytta, birge em qabyldaǵan naýqastar shyqqan soń da, top bolyp emdeledi. Ádette, kúızeliske túsken ne jalǵyz qalǵan adamdar esirtkini bastaıdy. Endi emdelip shyqqan soń, qaıta jalǵyz qalmaý úshin naýqastar top bolyp uıymdasyp, birin-biri qoldap, kómektesip júredi.
Aıta keteıik, buǵan deıin Almatyda esirtkige táýeldi adamdardyń sany azaıǵanyn jazǵanbyz.
