Esirtkige táýeldilik máseleleri boıynsha keńes beretin jańa servıs iske qosyldy
ASTANA. KAZINFORM — Qazaqstandyqtar endi esirtkige táýeldilikke qatysty suraqtaryna jasandy ıntellekt kómegimen jaýap ala alady. Pavlodar oblysynda azamattarǵa qajetti aqparat usynyp, qaıda júginýge bolatynyn túsindiretin jańa Antinarko.kz tsıfrlyq servısi iske qosyldy. Bul týraly Polisia.kz jazdy.
Pavlodar oblysynyń polıtsııa departamenti azamattarǵa esirtkige qarsy aqparat pen konsýltatsııalyq kómektiń qoljetimdiligin arttyrýǵa baǵyttalǵan jańa Antinarko.kz tsıfrlyq servısin tanystyrdy.
Jańa resýrstyń tanystyrylymy óńirdiń basty sahnasy — Ertis Promenade alańynda ótti. Antinarko.kz — konsýltatsııalyq qyzmeti jasandy ıntellekt tehnologııalary arqyly júzege asyrylatyn Qazaqstandaǵy alǵashqy jobalardyń biri.
— Jobany qurý ıdeıasy 11 jyldyq praktıkalyq jumys tájirıbemnen jáne qıyn jaǵdaıǵa tap bolǵan adamǵa eń aldymen jyldam ári túsinikti aqparat qajet ekenin túsinýden týyndady. Adamǵa qaıda júginý kerektigin, qaı jerden kómek alýǵa bolatynyn jáne zańnamada qandaı jaýapkershilik qarastyrylǵanyn bilý mańyzdy. Sondyqtan kez kelgen ýaqytta qoljetimdi ári qajetti aqparatty onlaın alýǵa múmkindik beretin qural jasaǵym keldi, — dedi Pavlodar oblysy polıtsııa departamenti esirtki qylmysyna qarsy is-qımyl basqarmasynyń asa mańyzdy ister jónindegi aǵa jedel ýákili, polıtsııa podpolkovnıgi Irına Tımırgalıeva.
Antinarko.kz servısinde paıdalanýshylar medıtsınalyq uıymdar, kómekke júginý tártibi jáne zańnamada kózdelgen jaýapkershilik sharalary týraly aqparat ala alady. Sonymen qatar paıdalanýshylarǵa jasandy ıntellekt negizindegi konsýltatsııalyq servısti paıdalaný múmkindigi usynylǵan.
Tsıfrlyq resýrstyń iske qosylýy Pavlodar oblysy polıtsııa departamentiniń profılaktıkalyq jumysty tsıfrlandyrý baǵytyndaǵy bastamalarynyń biri boldy. Jańa servıs esirtkige qatysty quqyq buzýshylyqtardyń aldyn alýǵa, halyqtyń quqyqtyq saýattylyǵy men aqparattandyrylýyn arttyrýǵa, sondaı-aq konsýltatsııalyq kómektiń tsıfrlyq formattaǵy qoljetimdiligin keńeıtýge baǵyttalǵan júıeli jumystyń bir bóligi bolyp tabylady.
Buǵan deıin anonımdi narkologııalyq konsýltatsııa kabınetteri óńirlerde ashylatynyn jazǵan edik.
