Esirtkige táýeldi bolyp qalǵan astanalyqtar kimge anonımdi jolmen júgine alady
ASTANA. KAZINFORM – Astana qalasy Qoǵamdyq densaýlyq saqtaý basqarmasy basshysynyń orynbasary Aınur Tóleýova esirtkige táýeldi bolǵan astanalyqtar kimge anonımdi negizde habarlasa alatynyn aıtty.
- Adam esirtkige táýeldilik problemasymen betpe-bet kelse anonımdi jolmen júginip keńes suraı ala ma, - dep surady áleýmettik jeli qoldanýshysy óńirlik kommýnıkatsııalar qyzmeti ótkizgen baspasóz máslıhatynda.
Aınur Tóleýova ol úshin arnaıy senim telefondar qurylǵanyn atap ótti.
- Qalamyzda senim telefondary bar. Sondaı-aq qalalyq psıhıkalyq densaýlyq ortalyǵynda anonımdi kabınetter ashylǵan. Ol jerde narkologtan keńes, psıhologııalyq kómek alýǵa bolady. Sonymen qatar qaladaǵy 8 emhananyń janynda bastapqy psıhologııalyq densaýlyq ortalyqtary jumys isteıdi. Ol jerde de narkolog pen psıhologtyń kabıneti uıymdastyrylǵan. Senim telefondary men anonımdi narkolog kabınetteri týraly málimettiń bárin bizdiń basqarmanyń saıtynan tabýǵa bolady, - dedi ol.
Aıta ketý kerek, búgin elordada esirtkige qarsy aılyq naýqan bastaldy.
Buǵan deıin Atyraýda 37 jastaǵy turǵyn 1 keliden astam sıntetıkalyq esirtkimen ustalǵan bolatyn.