Esirtkige táýeldi 18 myń adam esepte tur, onyń 66% kámeletke tolmaǵan — Bas prokýratýra

ASTANA. KAZINFORM — Elimizde esirtki qylmysyna qarsy kúres kúsheıtildi. Qazir elde esirtkige táýeldi 18 myń adam dıspanserlik tirkeýde tur. Onyń 66 paıyzy — kámeletke tolmaǵan jastar.

Bul týraly Bas prokýrordyń birinshi orynbasary Tımýr Táshimbaev aıtty.

Spıkerdiń aıtýynsha, byltyr 27 tonnadan astam esirtki tárkilenip, 95 zańsyz zerthana joıylǵan. Bul saladaǵy jumystyń tıimdiligin arttyrý úshin quqyq qorǵaý organdaryna naqty mindetter qoıylyp, olardyń nátıjeleri turaqty baǵalanyp otyrady.

Sonymen birge, telegram arnalar baqylaýǵa alynyp, arnaıy qyzmetkerler bekitilgen.

— Qazirgi ýaqytta arnaıy prokýrorlar óndirisinde esirtki dúkenderine qatysty 6 iri is qaralyp jatyr. Bul ister boıynsha shamamen 50 adam qamaýǵa alyndy, olardyń 9-y — túrli kúshtik qurylymdardyń qyzmetkerleri. Osy jumystardyń aıasynda 3,5 mlrd teńge tárkilendi. Onyń jartysy krıptovalıýta túrinde, — dedi T. Táshimbaev «QazAqparat» aqparat agenttiginiń «Bizdin orta» podkastynda.

Buǵan deıin Bas prokýrordyń birinshi orynbasary Qazaqstanda bir qolǵa beriletin SIM-karta sanyn shekteıtin zań ázirlenip jatqanyn aıtty. Qazaqstanda jasalatyn qylmystardyń 34%-y alaıaqtyq baǵytynda. Ásirese, onyń teń jartysy — ınternet-alaıaqtyq.

Prezıdent Qasym-Jomart Toqaev Ulttyq quryltaıdyń IV otyrysynda nashaqorlyqqa jáne esirtki bıznesine qarsy kúres týraly keshendi jospar ázirleýdi tapsyrǵan edi.