Esirtkige qarsy kúres jónindegi Ortalyq Azııa úılestirý ortalyǵynyń keńsesi Astanaǵa kóshirilmek

SAMARQAND. KAZINFORM — Esirtkige qarsy kúres jónindegi Ortalyq Azııa óńirlik aqparattyq úılestirý ortalyǵynyń keńsesi Almatydan Astanaǵa kóshirilýi múmkin. Muny Samarqandta ótip jatqan otyrysta atalǵan ortalyqtyń dırektory Mahmýd Hamıdov aıtty, dep habarlaıdy Kazinform agenttiginiń menshikti tilshisi.

— Biz Qazaqstannyń quzyretti organdarymen birlesip, ortalyǵymyzdy Astana qalasyna kóshirý múmkindigin pysyqtap jatyrmyz. Bul qalada barlyq memlekettik organdar, halyqaralyq uıymdardyń keńsesi, elshilikter ornalasqan. Sondaı-aq, Astanada mańyzdy halyqaralyq is-sharalardyń júıeli uıymdastyrylyp turatynyn eskere otyryp, biz elordaǵa kóshý óte oryndy sheshim dep sanaımyz, — dedi Mahmýd Hamıdov.

Buǵan qosa, spıker ortalyq sheńberinde seriktestikti tereńdetý mindetterine toqtaldy. Onyń sózinshe, yntymaqtastyqty nyǵaıtýdaǵy Qazaqstannyń róli asa mańyzdy.

— Ortalyq qyzmetin jetildirý maqsatynda tsıfrlyq tehnologııalardy, jasandy ıntellektini engizý múmkindigin jáne derekter bazasyn ıntegratsııalaý arqyly taldaý jumysyn jandandyrýǵa nıettimiz. Qazirgi ýaqytta biz bul baǵytta Qazaqstannyń quqyq qorǵaý organdarynyń akademııasy jáne Bas prokýratýrasymen yntymaqtastyqty nyǵaıtyp jatyrmyz, — dep toqtaldy M.Hamıdov.

Sonymen qatar, spıker ortalyqtyń tıimdiligi men áleýetin arttyrý mańyzdy ekenin basa aıtty. Tıisinshe, taıaýda Qytaı, Iran, Mońǵolııa, Úndistan, Túrkııa sııaqty seriktesterdiń Esirtkige qarsy kúres jónindegi Ortalyq Azııa óńirlik aqparattyq úılestirý ortalyǵyna ókiletti múshe retinde qosylýy yqtımal.

Aıta keteıik, atalǵan ortalyqqa qazirgi ýaqytta 7 memleket — Qazaqstan, Ózbekstan, Ázerbaıjan, Reseı, Túrikmenstan, Tájikstan jáne Qyrǵyzstan múshe.

Eske salsaq, osy is-shara barysynda baıandama jasaǵan Ózbekstan Qaýipsizdik keńesi hatshysynyń orynbasary Bahodır Tashmatov Ortalyq Azııa arqyly jylyna 90 tonnaǵa jýyq geroın ótetinin málimdedi.