Esirtkige elikkenderdi emdeýdiń jańa klınıkalyq hattamasy ázirlenip jatyr

ASTANA. KAZINFORM – Sıntetıkalyq esirtki tutyný saldarynan psıhıkalyq minez-qulqy buzylǵandardy emdeýdiń jańa klınıkalyq hattamasy ázirlenip jatyr. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- Densaýlyq saqtaý mınıstrligi «Jańa psıhıkalyq belsendi zattardy qoldanýdan týyndaǵan psıhıkalyq minez-qulyq buzylystaryn» dıagnostıkalaý men emdeýdiń jańa klınıkalyq hattamasyn ázirlep jatyr. Qujat elitý jaǵdaıyn dıagnostıkalaý men medıtsınalyq kýálandyrýdyń kóp satyly algorıtmin qarastyrady», - dedi Úkimet basshysy jaýabynda.

Premer-mınıstrdiń atap ótýinshe, medıtsınalyq kýálandyrýdyń qoldanystaǵy dıagnostıkasy halyqaralyq standarttarǵa sáıkes júzege asyrylady jáne kóp komponentti baǵalaýǵa (klınıkalyq tekserý, psıhomotorlyq fýnktsııalardy testileý, zerthanalyq dıagnostıkalyq ádister jáne ekspress-testileý) negizdelgen. Naryqta jańa sıntetıkalyq esirtkilerdiń paıda bolýyn eskere otyryp, Densaýlyq saqtaý mınıstrligi psıhıatrııa jáne narkologııa salasynyń sarapshylarymen birge psıhıkalyq belsendi zattardyń jańa túrlerin eskerýge múmkindik beretin medıtsınalyq kýálandyrý júıesin jetildirý boıynsha jumys istep jatyr.

- Psıhıkalyq belsendi zattardyń keń shoǵyryna ekspress-testterdi qoldaný boıynsha normatıvtik quqyqtyq aktilerge qajetti túzetýler engizý 2025 jyldyń sońyna josparlanǵan, - dedi Oljas Bektenov.

Buǵan deıin Astana qalalyq polıtsııa departamenti esirtki qylmysyna qarsy is-qımyl basqarmasynyń asa mańyzdy ister jónindegi aǵa jedel ýákili Álııa Qıbatqyzy sıntetıkalyq esirtki táýeldilikti erte shaqyratynyn, bir ret tutynǵannan «tutqyn» bolyp jatqandar bar ekenin aıtqan bolatyn.