Esirtkige baılanysty qylmystyń teń jartysy ınternet arqyly jasalady – Bolatbek Najmetdınuly
Májilis depýtaty, «AMANAT» partııasy fraktsııasynyń múshesi Bolatbek Najmetdınuly Shymkent qalasy Polıtsııa departamentiniń Jedel basqarý ortalyǵyna baryp, ujymmen kezdesti, dep habarlaıdy Kazinform.
Jıynǵa «AMANAT» partııasynyń músheleri, polıtsııa departamentiniń basshylyq quramy men qyzmetkerleri qatysty.
Májilis depýtaty búginde Shymkent qalasy boıynsha barlyǵy 81 eldimeken, 4 200 kóshe bar ekenin aıtyp, osy aýmaqtarda qylmys sanynyń kóbeıip kele jatqanyna toqtaldy.
– Quqyqtyq memlekettiń zańnamasy qoljetimdi, qarapaıym jáne qısyndy bolýy kerek. Árbir azamat zań mánin, óz quqyqtary men mindetterin bilýi jáne qorǵaı alýy tıis. Shymkent qalasynda esirtkini zańsyz tasymaldaý, satý faktisi kóbeıgen. Esirtki qylmysyna qarsy is qımyl basqarmasynyń qyzmetkerleri ótken jyly esirtkimen baılanysty 506 qylmystyq quqyq buzýshylyqty anyqtady. Nátıjesinde, zańsyz aınalymnan 137 keli esirtki zattary, onyń ishinde 15 keliden astam sıntetıkalyq esirtki tárkilengen, - dedi Bolatbek Najmetdınuly.
Depýtattyń aıtýynsha, esirtki satýmen baılanysty qylmystyń teń jartysy ınternet arqyly jasalyp, onymen aınalysatyndardyń 80 paıyzy 30 jasqa deıingi azamattar ekeni anyqtalǵan. Ótken jyly esirtkige táýeldi adamdardyń sany 158-ge artqan.
Shymkent qalalyq Polıtsııa departamentiniń basshysy Dýman Ashkenulynyń málimetinshe, «Qaýipsiz mektep» baǵdarlamasy aıasynda 186 memlekettik jáne jekemenshik mektepterde 3 318 beınebaqylaý kamerasy ornatylǵan. Al «Qaýipsiz aýla» qaǵıdasy boıynsha «Qazaqtelekom» AQ-nyń 2430 beınebaqylaý kamerasy Polıtsııa departamentiniń Jedel basqarý ortalyǵyna biriktirilgen.
Sonymen qatar jerasty ótkelerinde, densaýlyq saqtaý nysandarynda, saýda ortalyqtarynda, bazarlarda jáne dúkenderde 262 beınebaqylaý kamerasy jumys istep tur.
