Esirtkiden túsken 2,6 mlrd teńge zańsyz kiriske tosqaýyl qoıyldy
ASTANA.KAZINFORM — Bas Prokýror Berik Asylovtyń tóraǵalyǵymen Bas prokýratýranyń 2026 jyldyń birinshi jartyjyldyǵyndaǵy qyzmet qorytyndylaryna arnalǵan keńeıtilgen alqa otyrysy ótti.
Otyrys barysynda qadaǵalaý organynyń basshysy prokýratýra organdary qyzmetiniń basty nazarynda Prezıdent Qasym-Jomart Toqaevtyń Ádiletti Qazaqstan qurýǵa, zań ústemdigin qamtamasyz etýge, qoǵamdyq qaýipsizdikti nyǵaıtýǵa jáne azamattardyń konstıtýtsııalyq quqyqtaryn múltiksiz qorǵaýǵa arnalǵan baǵytyn iske asyrý máseleleri turǵanyn aıtty.
— Qazirgi ýaqytta elimizde aýqymdy reformalar júrgizilýde. Jańa Konstıtýtsııa adam quqyqtarynyń kepildikterin edáýir kúsheıtip, olardy qorǵaý tetikterin keńeıtti. Prokýratýra konstıtýtsııalyq reformalardyń negizgi maqsattaryna qol jetkizýge óz úlesin qosýy tıis. Bizdiń mindetimiz — Konstıtýtsııanyń árbir normasynyń azamattardyń ómirinde naqty júzege asýyn qamtamasyz etý jáne zańnyń búkil qoǵam úshin buljymas qundylyq bolyp qalýyna yqpal etý, — dep atap ótti Berik Asylov.
Esepti kezeńniń qorytyndysy boıynsha qyzmettiń negizgi baǵyttarynyń basym bóliginde oń serpin baıqalǵany aıtyldy.
«Zań jáne tártip» ıdeologııasyn ilgeriletý, «Halyq únine qulaq asatyn memleket»tujyrymdamasyn júzege asyrý, ınvestıtsııalyq qaýipsizdikti qamtamasyz etý jáne tsıfrlyq transformatsııany odan ári damytý baǵytynda keshendi sharalar qabyldandy.
Quqyqtyq tártiptiń jaqsarýyna quqyq qorǵaý organdary qyzmetin úılestirýdiń kúsheıýi, quqyqbuzýshylyqtardyń aldyn alý jumystary jáne tsıfrlyq tehnologııalardy engizý mańyzdy yqpal etti.
— Qylmystyq quqyq buzýshylyqtar deńgeıi 10%-ǵa tómendedi (onyń ishinde aýyr jáne asa aýyr qylmystar), sondaı-aq alaıaqtyq qylmystar sany 13%-ǵa azaıdy.
Prokýratýra organdary quqyq qorǵaý organdarymen jáne qarjy ınstıtýttarymen ózara is-qımyl jasaı otyryp, esirtki trafıginiń ınternet-ınfraqurylymyn joıý boıynsha belsendi jumys istep jatyr.
Prokýrorlardyń qabyldaǵan sharalarynyń nátıjesinde 2025 jyldan beri 530 myń «dropperlik» shot buǵattalyp, 2,6 mlrd teńge kólemindegi esirtkiden túsken zańsyz kiristerge tosqaýyl qoıyldy, sondaı-aq osy baǵyttaǵy 10 myń saıttyń qyzmeti toqtatyldy, — delingen habarlamada.
Berik Asylov qylmystyń aldyn alý, turmystyq zorlyq-zombylyqtyń, balalarǵa qarsy jynystyq sıpattaǵy qylmystardyń, alaıaqtyq pen esirtki saýdasynyń jolyn kesý jumystaryn kúsheıtý qajettigine nazar aýdardy.
Azamattardyń konstıtýtsııalyq quqyqtaryn qamtamasyz etý qoǵam ómiriniń barlyq negizgi ári sezimtal salalaryn qamtydy.
Qylmystyq protseste azamattardyń quqyqtaryn quqyqtyq qorǵaýǵa, bas bostandyǵynan aıyrý oryndarynda zańdylyqtyń saqtalýyna, múmkindigi shekteýli adamdardyń quqyqtarynyń buzylýyna jol bermeýge, sondaı-aq azamattardyń eńbek quqyqtaryn qorǵaýǵa erekshe nazar aýdaryldy.
— Prokýrorlyq qadaǵalaý aktileri boıynsha 2,1 mlrd teńge kólemindegi jalaqy bereshegi ótelip, 168 myń jumyskerdiń quqyqtary qalpyna keltirildi.
Myńnan astam múmkindigi shekteýli adamnyń ońaltý quraldaryn alý, áleýmettik ınfraqurylym nysandaryna qol jetkizý quqyqtary qorǵaldy.
Kámeletke tolmaǵandardyń, onyń ishinde bilim alý, turǵyn úımen jáne medıtsınalyq qamtamasyz etýmen qamtylý quqyqtarynyń saqtalýy prokýrorlardyń turaqty baqylaýynda.
Máselen, prokýrorlyq qadaǵalaý aktileri boıynsha 10 myńnan astam jasóspirimniń josparly aýrýhanaǵa jatqyzylý, tegin tamaqtaný quqyqtary qorǵaldy, sondaı-aq 2 myńnan astam jetim bala turǵyn úımen qamtamasyz etilip, turǵyn úı kezegindegi quqyqtary qalpyna keltirildi, — delingen habarldamada.
Osy salada memlekettik organdar men uıymdardyń 2,9 myń laýazymdy tulǵasy ártúrli jaýaptylyq túrlerine tartyldy.
