Esirtki jasaýǵa qajet zattar aınalymyna jazany qatańdatatyn zań qabyldaýǵa daıynbyz — depýtat
ASTANA. KAZINFORM — Májilis depýtattary esirtki jasaýǵa qajetti zattar aınalymy úshin jaýapkershilikti qatańdatatyn zań qabyldaýǵa daıyn. Bul týraly Úkimet basshysynyń orynbasary Tamara Dúısenovaǵa saýal joldaǵan Májilis depýtaty Nursultan Baıtilesov aıtty.
«Prezıdent Atyraýdaǵy Ulttyq quryltaıda ultymyzǵa qaýip tóndiretin, jastarymyzdy qurdymǵa aparatyn birneshe qoǵamdyq keselge toqtaldy. Onyń ishinde ózekti máseleleriniń biri — lýdomanııa men sıntetıkalyq narkotık. Memleket basshysy bul jaıynda: „Shyn máninde, lýdomanııa — beıbit kúnde eldiń shyrqyn buzyp jatqan qater. Biz nashaqorlyqqa jáne esirtki bıznesine qarsy kúresý úshin keshendi jospar qabyldadyq. Úkimet lýdomanııamen kúreske qatysty dál sondaı jospar qabyldaýy kerek. Qumarpazdyqqa zań júzinde shekteý qoıý qajet“ dep naqty tapsyrma berdi. Byltyr Prezıdent Qaýipsizdik keńesiniń jıynynda da lýdomanııany aýyzdyqtaýdy tapsyrǵan edi. Shynynda bul qoǵamdyq dert qanshama jandy qıyn jaǵdaıǵa dýshar etip, shańyraǵyn shaıqaltty. Qumar oıynǵa shyrmalǵan talaı azamat qaryzǵa batty, zań buzyp, qylmysqa uryndy. Tyǵyryqqa tirelip, ózine ózi qol jumsaǵandar sany da, ókinishke qaraı, órship barady», — dedi depýtat.
Onyń atap ótýinshe, qazir Lotomatık jáne basqa lotereıa termınaldary OLX jáne basqa marketpleısterde erkin satylyp jatyr. Osy apparattardy satyp alyp, turǵyn úılerdiń astyndaǵy dúkenderde zańsyz oıyn bıznesin uıymdastyryp, sottalyp jatqan azamattar da barshylyq.
«ıAǵnı biz bıýrokratııamen aınalysyp, jospar quryp, ony oryndaýǵa kiriskenshe, bul qoǵamdyq dert órship jatyr. Buǵan qoǵam bolyp tosqaýyl qoıatyn ýaqyt keldi. Bul dertpen barlyq qoǵamdyq, saıası, kreatıvti ındýstrııa, basqa da kúshterimizdi jumyldyra otyryp, salaýatty ómir saltyn jastardyń sózimen aıtqanda „meınstrımge“ aınaldyrýymyz qajet. El azamattarynyń zııandy ádetke boı aldyrýynyń aldyn alyp, qoǵamdy qaterli dertten aıyqtyrý úshin jan-jaqty sharalar tez arada qabyldanýy qajet. Bunymen qosa taǵy bir alańdatarlyq másele — órship ketken esirtki óndirisi men saýdasy», — dedi ol.
Depýtat dereginshe, elimizde tek byltyrdyń ózinde esirtkige qatysty 7,5 myńnan astam qylmystyq is tirkelip, zańsyz aınalymnan 41 tonna esirtki alynypty. Bul — dabyl qaǵarlyq jaǵdaı.
«Bul indet bizge syrttan kelgeni anyq. Halyqaralyq tájirıbeni pysyqtap, eń úzdigin qoldanýymyz qajet. Іshki ister mınıstrligi bul úrdisti qatań baqylap, tek jaza qoldanyp qana emes, profılaktılyq sharalardy kóptep engizýi qajet dep sanaımyz. Qazirgi ýaqytta esirtki bıznesiniń jańa kórinisterine qarsy kúresti kúsheıtý úshin Májilis prekýrsorlardyń (olardyń kontrabandasy ǵana qylmystyq jazalanady), esirtki jasaý úshin paıdalanylatyn ózge de zattar men jabdyqtardyń (munda mindetti belgi olardy ótkizý bolyp tabylady) eldegi zańsyz aınalymy úshin jaýapkershilikti qatańdatýdy kózdeıtin zań jobasyn qabyldaýǵa daıyn ekenin málimdeımiz», — dedi Májilis depýtaty.
