Esirtki zerthanasyn uıymdastyrǵan qylmystyq top uıymdastyrýshylary 23 jylǵa sottaldy
KÓKShETAÝ. KAZINFORM - Aqmola oblysynyń mamandandyrylǵan sotynyń úkimimen Ereımentaý qalasynyń shetindegi jeke úıde esirtki zerthanasyn uıymdastyrǵan transulttyq qylmystyq top sottaldy.
Aqmola oblysy prokýratýrasynyń málimetinshe, joǵaryda atalyp ketken top keıinnen Astana aýmaǵynda satý úshin asa iri kólemde sıntetıkalyq esirtki óndirisin iske asyrýdy kózdegen.
Transulttyq qylmystyq toptyń quramynda Ýkraına men Moldova azamattary bolǵan.
Olardy ustaý kezinde qylmys ornynan 10 keli mefedron men 17 keliden astam prekýrsorlar, sondaı-aq sıntetıkalyq esirtki óndirýge arnalǵan arnaıy qural-jabdyqtar tabyldy.
Qylmyskerler sıntetıkalyq esirtkini qatań qupııalylyqta jasaǵan. Úı onlaın rejıminde derekterdi uıymdastyrýshyǵa jiberetin beınebaqylaý júıesimen jabdyqtalǵan, al shıkizat pen daıyn ónimdi saqtaý úshin garaj jalǵa alynǵan.
Qylmystyq is Ereımentaý aýdanynyń prokýratýrasymen sotqa joldaný barysynda, atalǵan tulǵalardyń áreketi transulttyq uıymdasqan top retinde saralanǵan.
Sot barysynda memlekettik aıyptaýshy sottalýshylardyń kinásin tolyq dáleldedi.
Uıymdastyrýshy 23 jylǵa, al sybaılastary 22 jylǵa múlki tárkilene otyryp, bas bostandyǵynan aıyrý túrindegi jaza taǵaıyndaldy.
Úkim zańdy kúshine endi.
Bıyl zańsyz aınalymnan 1 tonnadan astam esirtki tárkilengenin jazǵan bolatynbyz.
