Esirtki zerthanasyn qurǵan aqmolalyq 14 jylǵa sottaldy
KÓKShETAÝ. KAZINFORM - Esirtki zerthanasyn zańsyz qurǵan aqmolalyqqa qatysty Aqmola oblysynyń qylmystyq ister jónindegi mamandandyrylǵan aýdanaralyq sotynda alqabıler alqasynyń qatysýymen aıyptaý úkimi shyqty.
Aqmola oblysy prokýratýrasy baspasóz qyzmetiniń málimetinshe, sottalýshy kýratordyń nusqaýlaryn basshylyqqa ala otyryp, psıhotroptyq zattar men olardyń analogtaryn zańsyz jasaý úshin barlyq qajetti komponentter men jabdyqtardy jınap, jasyryn zerthanany uıymdastyrýǵa jeke úı tapqan.
Jedel is-sharalar barysynda jasyryn esirtki zerthanasynyń qyzmeti toqtatyldy, zańsyz aınalymnan 50 myńnan astam bir rettik esirtki dozasynan turatyn 5 kg astam alfa RVR psıhotroptyq zaty tárkilendi.
«Kináli sot aldynda jaýap berdi, memlekettik aıyptaýshy alqabılerge sottalýshynyń zerthanany zańsyz qurýǵa qatysy bar ekendigi týraly daýsyz dálelder keltirdi. Alqabılerdiń úkimimen aqmolalyq 14 jylǵa bas bostandyǵynan aıyryldy», - dedi vedomstvodan.
Osyǵan baılanysty, Aqmola oblysynyń prokýratýrasy azamattardy tyıym salynǵan zattardy ótkizý deregi belgili bolǵan kezde, dereý quqyq qorǵaý organdaryna habarlaýǵa shaqyrady.
Aıta ketsek, budan buryn Aqmola oblysynda esirtkige masaıǵan júrgizýshi ustalǵanyn jazǵan edik.
