Esirtki taratýshylardy ustaýǵa kómektesken ShQO turǵyndary mln teńgeden astam syıaqy aldy
ÓSKEMEN. KAZINFORM – Shyǵys Qazaqstan oblysynda azamattardyń qyraǵylyǵy esirtkiniń zańsyz aınalymyna qarsy kúrestiń tıimdi quralyna aınalyp keledi. Quqyq qorǵaý organdaryna naqty aqparat bergen turǵyndarǵa aqshalaı syıaqy tólenip jatyr.
Jyl basynan beri óńir turǵyndary esirtki satýshylardy anyqtaýǵa kómektesken shynaıy aqparattary úshin mln teńgeden astam syıaqy alǵan.
Sybaılas jemqorlyq faktileri týraly habarlaǵandarǵa beriletin dástúrli syıaqydan aıyrmashylyǵy, esirtki qylmystaryna qatysty tólem mólsheri ózge tártippen belgilenedi. Máselen, sybaılas jemqorlyq derekteri boıynsha syıaqy para nemese memleketke keltirilgen zalal kólemine baılanysty bolsa (ádettegi isterde 30-dan 100 AEK-ke deıin, al asa iri kólemdegi jymqyrý derekteri boıynsha somanyń 10 paıyzy, biraq 4000 AEK-ten aspaıdy), esirtkige qarsy kúreste ár jaǵdaı jeke qarastyrylady.
Búginde ShQO-da «STOP esirtki!» pılottyq jobasy júzege asyrylyp jatyr. Sonyń aıasynda syıaqy kólemi usynylǵan aqparattyń mańyzdylyǵy men tárkilengen tyıym salynǵan zattardyń mólsherine qaraı belgilenedi.
Óskemendegi oqıǵalar da syıaqy kóleminiń tárkilengen esirtki partııasyna baılanysty ekenin kórsetedi. Máselen, 60 gramm sıntetıkalyq esirtkimen er adamdy ustaýǵa múmkindik bergen aqparat úshin qala turǵynyna 305 myń teńge tólendi. Al taǵy bir óskemendik 1 keliden astam sıntetıkalyq esirtkiniń zańsyz aınalymyna tosqaýyl qoıýǵa kómektesken. Nátıjesinde jyl basynan beri osy eki derek boıynsha tólengen syıaqynyń jalpy kólemi mln teńgeden asqan.
– «STOP esirtki!» pılottyq jobasy aıasynda esirtki quqyq buzýshylyqtaryn anyqtaýǵa jáne jolyn kesýge yqpal etetin shynaıy aqparat bergen azamattarǵa aqshalaı syıaqy qarastyrylǵan. Onyń mólsheri usynylǵan málimetter men olardyń mańyzdylyǵyna qaraı belgilenedi. Bul rette aqparattyń shynaıylyǵy mindetti túrde rastalýy kerek. Azamattar esirtki taratý, esirtki jasyrynatyn oryndardy uıymdastyrý, esirtki zerthanalary ornalasýy múmkin jerler, ınternet-dúkender, esirtki jarnamasy men QR-kodtardyń taralýy týraly habarlaı alady. Ýaqtyly berilgen bir ǵana aqparat esirtki saýdasynyń jolyn kesip, jastardyń zańsyz aınalymǵa tartylýynyń aldyn alýy múmkin, – dep habarlady ShQO polıtsııa departamentiniń baspasóz qyzmetinen.
Qazirgi ýaqytta quqyq qorǵaý organdaryna aqparatty birneshe jolmen, sonyń ishinde qupııa túrde jetkizýge bolady:
• «Clean Streets» mobıldi qosymshasy arqyly. Servıs esirtki jasyrylǵan oryndardyń, esirtki jarnamasy bar jazýlardyń nemese kúmándi nysandardyń fotosýretteri men naqty geolokatsııasyn anonımdi túrde jiberýge múmkindik beredi;
• «102» jedel arnasy arqyly. Aýla, kireberis nemese saıabaq aýmaǵynda belgisiz adamdardyń túıinshekterdi qaldyryp nemese izdep júrgenin baıqasańyz, habarlaýǵa bolady;
• ShQO prokýratýrasynyń senim telefondary arqyly: 14 68 nemese 8 (771) 659-53-22.
Quqyq qorǵaý organdary habarlamany jedel tekserý úshin oqıǵanyń naqty ýaqyty men ornyn, kúdiktiniń syrtqy belgilerin, qaı baǵytqa ketkenin, paıdalanylǵan kóliktiń markasyn, túsin jáne memlekettik nómirin kórsetýdi usynady.
Sonymen qatar polıtsııa turǵyndardan kúdiktilerdi óz betinshe ustaýǵa áreket jasamaýdy jáne olarmen janjaldaspaýdy qatań eskertedi.
Eske salsaq, osyǵan deıin Pavlodarda kolonııaǵa jiberilgen tis pastasynyń ishinen esirtki tabylǵany habarlanǵan.