Esirtki taratý jáne kontrabandamen aınalysqan qaraǵandylyq sottaldy

ASTANA. KAZINFORM — Qaraǵandy qalasynda esirtki zattarynyń zańsyz aınalymy men kontrabandasyna qatysty is boıynsha úkim shyǵaryldy, dep habarlaıdy Qarjylyq monıtorıng agenttiginiń baspasóz qyzmeti.

Tergeýdi Bas kólik prokýratýrasynyń úılestirýimen QMA Qaraǵandy oblysy boıynsha departamenti júrgizdi. Kolledj stýdentteriniń biri esirtki taratý arqyly tabys tabý múmkindigi týraly bilip, «Telegram» messendjeri arqyly belgisiz kýratormen «jasyrma-kýrer» jáne «qoıma» fýnktsııalaryn atqarý jóninde kelisim jasaǵan.

Onyń mindetterine berilgen koordınattar boıynsha esirtki zattaryn alý, saqtaý, bólip oraý, tasymaldaý jáne qala aýmaǵynda jasyryn oryndarǵa ornalastyrý kirgen. Kúnine ol shamamen 30 esirtki jasyrǵan.

— Sonymen qatar, sottalýshy Taılandtan Qazaqstanǵa esirtki zattaryn halyqaralyq poshta jóneltim arqyly jetkizýdi uıymdastyrǵan. Osy maqsatta ol «Telegram» messendjeri arqyly 400 myń teńge syıaqyǵa, kámeletke tolmaǵan dropperdi tartyp, jóneltimdi onyń atyna rásimdegen. Ol taýardy alý kezinde ustalyp, odan 909 gramm kannabıs ekstrakty tárkilendi. Tintý barysynda onyń turǵylyqty jerinen qosymsha 80 gramm esirtki zaty tabylyp, alyndy. Sondaı-aq uıaly telefondy tekserý kezinde onyń bir kún buryn birneshe jasyrma ornalastyrǵany anyqtaldy. Berilgen koordınattar boıynsha taǵy 3,34 gramm kannabıs ekstrakty tárkilendi. Sot úkimimen kináli 15 jyl merzimge bas bostandyǵynan aıyryldy. Úkim zańdy kúshine engen joq, — dedi QMA resmı ókili Ernar Taıjan.

Osyǵan deıin QMA belgili bloger Qaısar Qamzaǵa halyqaralyq izdeý jarııalaǵanyn jazǵan edik.