Esirtki taratty dep kúdikke ilingen qazaqstandyqtar Chernogorııada qamaýǵa alyndy
ASTANA. KAZINFORM — Qazaqstan Іshki ister mınıstrliginiń Interpol Ulttyq ortalyq bıýrosynyń suraýy boıynsha Chernogorııanyń Bar qalasynda halyqaralyq izdeýde júrgen eki kúdikti ustaldy, dep habarlaıdy Polisia.kz.
Vedomstvo atap ótkendeı, qaskóıler esirtki jáne psıhotroptyq zattardy satý; olardy tutynýǵa ıtermeleý; uıymdasqan qylmystyq toptyń quramynda bolý; laýazymdy tulǵaǵa para berý syndy áreketterge bardy dep kúdikke ilingen.
— 2024 jyldyń basynda kúdiktiler Telegram messendjeri arqyly ınternet-dúken ashyp, esirtki jáne psıhotroptyq zattardy satqany anyqtaldy. Qylmystyq shema boıynsha olar kýrerlik jumysqa qabyldaý týraly habarlandyrýlar arqyly basqalardy tartýmen, sondaı-aq barlyq zańsyz áreketterdi úılestirýmen jáne qarjylandyrýmen aınalysqan. Qazirgi ýaqytta kúdiktiler Chernogorııa aýmaǵynda qamaýda, — delingen habarlamada.
Osyǵan deıin Іshki ister mınıstrligi Esirtki qylmysyna qarsy is-qımyl komıteti tóraǵasynyń orynbasary Qýandyq Áljanov esirtki satatyn saıttardyń anonımdi qoldanýshylaryn áshkereleýge ne kedergi ekenin aıtty.