Esirtki isimen túrmede otyrǵandar jańa zańǵa sáıkes jazasyn jeńildete alady

ASTANA. KAZINFORM – Elimizde esirtki taratýshylarǵa qatysty zańǵa birqatar ózgeris engizildi. Zań kimderdiń jazasyn qatańdatty? Kimderge jeńildik jasaıdy? 

Byltyr 27 jeltoqsanda QR Prezıdentiniń buıryǵymen zańnamaǵa ózgertýler men tolyqtyrýlar engizildi. Bul zań 2025 jyly 3 naýryzda zańdy kúshine enedi.

Qylmystyq kodekstiń 297 jáne 297-1-baptaryna sáıkes qazir slengke aınalǵan «zakladchıkterge» qatysty sanktsııa tómendedi. 297-bapta kózdelgen jaýapkershilikter 3 tarmaqqa bólinedi. ІІM Esirtki qylmysyna qarsy is-qımyl komıtetiniń asa mańyzdy ister jónindegi aǵa jedel ýákili Medetbek Smaǵulov KazInform agenttigine bergen suhbatynda tarqatyp aıtty. 

— Birinshi tarmaǵyna sáıkes, eger tasymaldanǵan esirtkiniń kólemi 50 gr deıin — marıhýana, 5 gr deıin — gashısh, 0,02 gr deıin — mefedron, 0,01 gr deıin — alfa-PVP bolatyn bolsa, bul az mólsherdegi esirtki dep tanylyp, 5 jyldan 8 jylǵa deıin bas bostandyǵynan aıyrý kózdeledi.

Ekinshi tarmaǵy boıynsha 6 jyldan 10 jylǵa deıin bas bostandyǵynan aıyrylady. Kórsetkishterge toqtalsaq, marıhýana — 1 kelige deıin, gashısh — 200 gr deıin, mefedron — 1,5 kelige deıin, alfa-PVP — 1 kelige deıin. Bul iri mólsherdegi esirtki tasymaldaý dep esepteledi. 

Úshinshi kezeńi — asa iri mólsherde esirtki tasymaldaý dep atalady. Bul tarmaqqa sáıkes marıhýana — 1,5 keliden, gashısh — 200 gramnan, mefedron 1,5 keliden, alfa-PVP — 1 keliden joǵary bolsa, 7 jyldan 12 jylǵa deıin bas bostandyǵynan aıyrý sharalary kózdelgen, - dedi ol.

Sanktsııalar burynǵysymen salystyrǵanda tómendetilgen. 

Al, esirtki jasaýshylar men laýazymdy tulǵalarǵa beriletin jaza kerisinshe qatańdaıdy. Olar 15 jyldan 20 jylǵa deıin nemese ómir boıyna bas bostandyǵynan aıyrylýy múmkin.

Oǵan qosa, buǵan deıin esirtkige qatysty qylmys jasap, qazir túrmede otyrǵandar da jańa zańǵa sáıkes jazasyn jeńildete alady.

— Qazaqstanda esirtkige qatysty 4 myńnan astam sottalǵan adam bar. Onyń 255-i — áıel, 9-y — kámeletke tolmaǵan bala. Olar jeńildetilgen sanktsııadaǵy normalardy qoldana alady. QR Qylmystyq kodeksiniń 6-babyna sáıkes, atalǵan norma zańdy kúshine engennen keıin qylmysker otyrǵan ákimshilik nemese jazasyn óteýshiniń ózi sotqa isin qaıta qaraý týraly aryz jaza alady. Sot aryzdy alǵan soń 1 aı ishinde isti qaraıdy. Statıstıkaǵa sáıkes, myńnan asa jazasyn óteýshi osy normany paıdalanyp sotqa aryz berý quqyna ıe, - deıdi Medetbek Smaǵulov.

Aıta keteıik, elordada esirtki taratýshydan asa iri kólemde gashısh maıy tárkilendi.