Esirtki saqtaǵany úshin kúdikke ilingen azamat Grýzııadan ekstradıtsııalandy
ASTANA. KAZINFORM - Bas prokýratýra men Іshki ister mınıstrliginiń qyzmetkerleri Qazaqstan Respýblıkasy Syrtqy ister mınıstrliginiń kómegimen asa iri mólsherde sıntetıkalyq esirtki quraldaryn saqtaǵany jáne tasymaldaǵany úshin qylmystyq jaýapkershilikke tartý maqsatynda Grýzııadan Qazaqstan azamatyn ekstradıtsııalady.
«2023 jyldyń maýsym aıynda jol polıtsııasy qyzmetkerleri Astana qalasynda jedel aldyn alý is-sharalaryn júrgizý barysynda kúdikti basqarǵan avtokólikti toqtatyp, onyń salonynda jalpy salmaǵy 18,96 gramm bolatyn 15 „mefedron“ baılamdary tabylǵan.
Sotqa deıingi tergep-tekserý kezinde qoǵamnan oqshaýlanýǵa baılanysty emes bultartpaý sharasynyń tańdalǵanyn paıdalanyp, qaskúnem tergeýden jasyrynyp, soǵan baılanysty halyqaralyq izdeýge jarııalanǵan», — dep jazdy Bas prokýratýradan.
Aǵymdaǵy jyldyń qańtarynda kúdikti Grýzııa aýmaǵynda ustaldy.
Qazirgi ýaqytta ol Qazaqstanǵa ekstradıtsııalanyp, Astana qalasynyń tergeý ızolıatoryna qamaldy.
Aıyptalǵan qylmysy úshin 3 jyldan 7jylǵa deıingi merzimge bas bostandyǵynan aıyrý jazasy qarastyrylǵan.
