Esirtki saqtaǵany úshin 7 jylǵa sottalǵan 21 jastaǵy azamattyń sotyna 1000-nan asa oqýshy qatysty

ASTANA. KAZINFORM — Elordanyń 25 mektebinen 1000-nan astam oqýshy onlaın jáne sot zalynda protseske qatysty. Bul týraly Bas prokýratýranyń baspasóz qyzmeti málim etti. 

Maqsat — jastar arasynda esirtki jáne psıhotroptyq zattardyń zańsyz aınalymy salasyndaǵy qylmystardyń aldyn alý.

— Sottalýshy oryndyǵynda aldyn ala sóz baılasý arqyly adamdar tobynda asa iri kólemde psıhotropty zattardy ótkizý maqsatynda zańsyz saqtaǵan 21 jastaǵy qala turǵyny otyrdy — delingen prokýratýra habarlamasynda.

Sot úkimimen kináli tulǵa 7 jylǵa bas bostandyǵynan aıyryldy.

Teris saldardyń aldyn alý maqsatynda Astana qalasynyń prokýratýrasy esirtki, psıhotroptyq zattardy, sol tektesterdi ótkizý maqsatynda zańsyz ıemdený, saqtaý, tasymaldaý, olardy jóneltý ne ótkizý — múlki tárkilenip 20 jylǵa deıin bas bostandyǵynan aıyrýǵa ákep soǵatynyn eskertedi.

Eske sala keteıik, buǵan deıin ShQO-da esirtki óndirýmen aınalysqan eki Latvııa azamatyna sot úkimi kesilgenin jazǵan edik.