Esirtki kontrabandasymen aınalysty degen kúdikti Reseıden ekstradıtsııalandy
ASTANA. KAZINFORM – Bas prokýratýra iri mólsherde gashısh esirtki quraly men mefedron psıhotroptyq zatynyń kontrabandasy úshin qylmystyq jaýapqa tartý maqsatynda Tájikstan azamatyn Reseı Federatsııasynan ekstradıtsııalady.
2022 jyldyń tamyz aıynda kúdikti Qostanaı oblysyndaǵy Qazaqstan Respýblıkasynyń memlekettik shekarasy arqyly tyıym salynǵan zattardy tasymaldamaq bolǵan kezde shekara qyzmetkerleri ustaǵan.
- Kúdiktiniń jeke basyn eskere otyryp, tergeý organy oǵan qoǵamnan oqshaýlaýmen baılanysty emes bultartpaý sharasyn tańdaǵan. Alaıda ol bul jaǵdaıdy paıdalanyp, belgilengen jaýaptylyqtan qutylý úshin tergeýden jasyrynyp, osyǵan baılanysty oǵan halyqaralyq izdeýge jarııalandy, - delingen Bas prokýratýra habarlamasynda.
2024 jyldyń mamyr aıynda kúdikti Ekaterınbýrg qalasynda ustalyp, sodan keıin Qazaqstan Respýblıkasynyń Bas prokýratýrasynyń suraýy boıynsha Qazaqstanǵa ekstradıtsııalandy.
Qazirgi tańda kúdikti tergeý ızolıatoryna qamaldy. Aıyptalǵan qylmysty jasaǵany úshin múlkin tárkilep, jeti jyldan on eki jylǵa deıin bas bostandyǵynan aıyrý túrindegi jaza qarastyrylǵan.
Buǵan deıin bes jyldan beri jasyrynyp júrgen qylmysker Grýzııadan ekstradıtsııalanǵan edi.