Esirtki kontrabandasymen aınalysqan astanalyq 16 jylǵa sottaldy
ASTANA. KAZINFORM — Kóliktegi polıtsııa departamentiniń qyzmetkerleri halyqaralyq poshta jóneltilimderi arqyly asa iri mólsherde esirtki zattaryn kontrabandalyq jolmen ótkizý faktisiniń jolyn kesti.
Polıtsııanyń málimetinshe, jedel-izdestirý is-sharalary barysynda Astananyń 32 jastaǵy turǵyny Taılandtan Qazaqstan Respýblıkasynyń aýmaǵyna úsh halyqaralyq poshta jóneltilimi arqyly ákelingen esirtki zaty, kannabıs syǵyndysyn kontrabandalyq jolmen ótkizgeni anyqtaldy. Tárkilengen esirtki zatynyń jalpy salmaǵy — shamamen 2,9 keli, bul asa iri mólsherge jatady.
— Tergeý áreketteri barysynda kúdiktiniń ýaqytsha turǵan jerine júrgizilgen tintý kezinde odan ári ótkizýge daıyndalǵan esirtki zattary, elektrondy tarazylar, býyp-túıý materıaldary, SIM-kartalar, aqsha qarajaty jáne qylmystyq is boıynsha zattaı dáleldemeler tárkilendi, — dep habarlady vedomstvo.
Bul derek boıynsha kólik polıtseıleri sotqa deıingi tergep-tekserý júrgizip, onyń qylmysqa qatysy baryn tolyq dáleldeıtin bultartpas aıǵaqtar jınady. Sot úkimimen qaskúnem asa iri mólsherdegi esirtki zattarynyń kontrabandasyn jasaǵany úshin kináli dep tanylyp, 16 jylǵa bas bostandyǵynan aıyryldy.
Aıta keteıik, jyl basynan beri kóliktegi polıtsııa departamenti qyzmetkerleri esirtkige qatysty 202 quqyq buzýshylyqty toqtatty. Onyń ishinde 41 ótkizý faktisi, asa iri mólsherde saqtaýdyń 6 faktisi jáne 16 kontrabanda faktisi tirkeldi. Zańsyz aınalymnan barlyǵy 172 keliden astam esirtki zaty tárkilendi.
Eske salaıyq, buǵan deıin shildeniń 10 kúninde Qazaqstanda 121 keliden astam sıntetıkalyq esirtki tárkilengenin habarlaǵan edik.
