Esirtki kontrabandasy úshin sottalǵan azamatsha Qyrǵyzstannan elge jetkizildi
ASTANA. KAZINFORM — Asa iri mólsherdegi esirtki zattardyń kontrabandasy men olardy ótkizgeni úshin sottalǵan áıel Qyrǵyz Respýblıkasynan ekstradıtsııalandy.
QR Bas prokýratýrasy Qyrǵyz Respýblıkasynan asa iri mólsherdegi esirtki zattardyń kontrabandasy jáne olardy ótkizgeni úshin sottalǵan Qazaqstan Respýblıkasynyń azamatshasyn, on alty jyl buryn shyǵarylǵan sot úkimin oryndaý úshin ekstradıtsııalady.
Іzdeýde júrgen tulǵa 2010 jyly aqshalaı syıaqy úshin salmaǵy 1 kılogramnan asatyn gashısh esirtki zatyn ótkizý maqsatynda QR Memlekettik shekarasy arqyly zańsyz ótkizgeni úshin Jambyl oblysynyń mamandandyrylǵan aýdanaralyq qylmystyq ister jónindegi sotynyń 2010 jylǵy 23 qarashadaǵy úkimimen kináli dep tanylyp, múlki tárkilene otyryp, 15 jyl 6 aı merzimge bas bostandyǵynan aıyrylǵan.
— Alaıda onyń asyraýynda jas balasynyń bolýyna baılanysty jazany óteý merzimi on tórt jasqa tolǵanǵa deıin keıinge qaldyrylǵan. Sottalǵan probatsııalyq baqylaýda bola tura, 2017 jyly sot úkimin oryndaýdan jaltarǵan, osyǵan baılanysty halyqaralyq izdeýge jarııalanǵan. Bıyl naýryzda ol Bishkek qalasynda ustalyp, Qazaqstan Respýblıkasy Bas prokýratýrasynyń suraýymen otanyna ekstradıtsııalandy. Qazir sottalǵan tergeý ızolıatoryna qamaldy, — delingen habarlamada.
Osyǵan deıin halyqaralyq izdeýdegi qazaqstandyq Túrkııada ustalyp, elge qaıtarylǵanyn jazdyq.
