Esirtki kómgishterdiń «qamqorshysy» polıtsııanyń ózi me – ІІM jaýaby

ASTANA. KAZINFORM – Іshki ister mınıstrligi Asa mańyzdy ister jónindegi aǵa jedel ýákil Medetbek Smaǵulov ortalyq kommýnıkatsııalar qyzmetinde ótip jatqan baspasóz máslıhatyna qatysty.

- Qoǵamda esirtki kómgishterdi polıtsııa qyzmetkerleriniń ózi búrkemelep otyrǵany týraly túsinik bar. Osyǵan ne deısizder, - dep surady odan jýrnalıst.

ІІM ókili bul qate túsinik degen jaýap aıtty.

- Esirtki jasyrǵyshtar ǵana jaýapqa tartylady degen máselege toqtalsaq, bul óte kúrdeli protsess bolǵandyqtan, esirtki saýdasyna qatysatyn tizbektiń ár býyny jaýapqa tartylady. Mysaly, bıyl ınternet arqyly esirtki saýdasyn uıymdastyrǵan 13 adam jaýapqa tartyldy. Bul ótken jyldarmen salystyrǵanda eki ese kóp. Onyń syrtynda uıymdasqan qylmystyq toptyń 52 múshesi jaýapkershilikke tartyldy, - dedi ol.

Medetbek Smaǵulov BAQ ókiliniń naqtylaý suraǵyna Іshki ister qyzmetiniń eshbir ókili esirtki kómgishterdiń qylmysyn búrkemeleý kúdigimen ustalmaǵanyn málim etti.

Aıta keteıik, Konstıtýtsııanyń 30 jyldyǵyna oraı jarııalanǵan raqymshylyq esirtki kómip, taratqany úshin sottalǵan jastarǵa qoldanylǵan joq.