Esirtki qylmysyna tartylǵan 60-tan astam jasóspirim ustaldy – ІІM
ASTANA. KAZINFORM – Qazaqstanda esirtkiniń zańsyz aınalymyna tartylǵan 60-tan astam kámeletke tolmaǵan jasóspirim ustaldy, dep habarlaıdy Polisia.kz.
«Zań men tártip» qaǵıdasyn iske asyrý aıasynda Іshki ister mınıstrligi esirtki qylmystaryn anyqtaý jáne olardyń jolyn kesý boıynsha belsendi jumystar júrgizip jatyr. Jasóspirimder men jastar arasyndaǵy aldyn alý sharalaryna erekshe nazar aýdarylǵan. Bul baǵytta kámeletke tolmaǵandardy esirtki ortasyna tartý faktilerin azaıtýǵa baǵyttalǵan is-sharalar júzege asyrylýda.
Jalpy respýblıka boıynsha shamamen 17 myńǵa jýyq esirtkige qarsy is-shara ótkizilgen. Olarǵa 2 mıllıonnan astam jasóspirim men jastar qamtylǵan.
Soǵan qaramastan, sońǵy ýaqytta esirtki quraldaryn taratý kezinde ustalǵan kámeletke tolmaǵandardyń sany artqany baıqalady. Máselen, Abaı oblysynda polıtsııa kolledjdiń birinshi kýrs stýdenti – kámeletke tolmaǵan qyzdy asa iri kólemde psıhotroptyq zat saqtaǵany úshin ustaǵan. Tintý barysynda odan 16 gramm sıntetıkalyq esirtki tabylyp, tárkilendi.
Sondaı-aq Shyǵys Qazaqstan oblysynda taǵy bir jasóspirim ustaldy. Ol Almatydan Óskemenge ushyp baryp, bir aı boıy ınternet-dúken arqyly tyıym salynǵan zattardy jetkizýmen aınalysqan. Ustaý kezinde odan α-PVP tobyna jatatyn 3 gramm sıntetıkalyq esirtki alyndy.
ІІM málimetinshe, búginde el boıynsha esirtki aınalymyna tartylǵan 60-tan astam jasóspirim anyqtalyp, ustalǵan.
Mınıstrlik ata-analardy balalardyń kimmen aralasatynyna jáne qandaı áleýmettik jeliler men messendjerlerdi paıdalanatynyna nazar aýdarýǵa shaqyrady. Sebebi mundaı resýrstarda «qashyqtan jumys» nemese «jeńil tabys» túrindegi habarlandyrýlar arqyly jasóspirimderdi zańsyz áreketterge tartý jaǵdaılary jıilegen.
ІІM eske salady:
-
esirtki jáne psıhotroptyq zattardy satýmen aınalysqandar qylmystyq jaýapkershilikke tartylady, mundaı qylmys úshin ómir boıyna bas bostandyǵynan aıyrý jazasy kózdelgen;
-
aldaǵy ýaqytta ata-analardyń salǵyrttyǵynan balalar quqyq buzýshylyqqa tartylǵan jaǵdaıda, ata-analyq mindetterin tıisinshe oryndamaǵany úshin jaýapkershilikti qatańdatý josparlanyp otyr.
Mınıstrlik azamattardyń, ásirese kámeletke tolmaǵandardyń ómiri men densaýlyǵyn qorǵaýǵa baǵyttalǵan «Zań men tártip» qaǵıdasyn júıeli túrde júzege asyrýdy jalǵastyratynyn habarlady. Jasóspirimderdi esirtki bıznesine tartýdyń árbir faktisi erekshe baqylaýda.
Aıta keteıik, Qaraǵandy oblysynda esirtki saýdasymen aınalysqan ınternet-dúken ıesi ustaldy.