Esirtki qylmysy úshin 28 pavlodarlyq uzaq jylǵa sottaldy

PAVLODAR. KAZINFORM - Jyl basynan polıtseıler esirtki zattaryna qatysty 144 zań buzýshylyqtyń jolyn kesken. Zańsyz aınalymnan 121 kılogramnan asatyn esirtki alyndy.

Ertis-Baıan óńirinde jyl basynan esirtki qylmysyna jol bergen 28 azamat ustalyp, sot sheshiminen uzaq jylǵa sottaldy.

- Zańsyz aınalymnan 121 kılogramnan astam túrli tyıym salynǵan zattar, onyń ishinde 9 kılogramnan astam «gashısh», 102 kılogramm marıhýana jáne 9,7 kılogramm sıntetıkalyq esirtki tárkilendi. Sonymen qatar esirtkini zańsyz saqtaýdyń 82 faktisi anyqtaldy. Mysal úshin sıntetıkadan shyqqan psıhoaktıvti zattardyń taralýyna mamandanǵan uıymdasqan 2 qylmystyq toptyń jol kesildi. Jedel is-sharalar barysynda aldyn ala sóz baılasý boıynsha áreket etken 5 azamat ustaldy. Olar óńir aýmaǵynda qaptamashylar arqyly esirtki zattaryn taratý maqsatynda telegramm messendjerinde ınternet dúken qurǵan,-dep habarlady Pavlodar oblysy polıtsııa departamentiniń nashaqorlyq qylmystaryna qarsy is-qımyl jónindegi basqarmasynyń bastyǵy Tımýr Qarjaýbaev.

Tártip saqshylary jyl basynan esirtkige qatysty 144 zań buzýshylyqtyń jolyn kesken. «Kıberbaqylaý» júıesi arqyly 75 zańsyz kontentke qol jetkizý shekteldi.

«OLX» habarlandyrý saıtynyń qazaqstandyq provaıderimen birlesip 115-ten astam jarııalanym joıyldy. Olardyń árqaısysynyń aýdıtorııasy birneshe myńnan mıllıonǵa deıin jetedi. Mundaı aqparattyq ónimderdiń eń qorǵalmaǵan sanattary men negizgi tutynýshylary - balalar men jasóspirimder. Olar agressıvti úgit-nasıhat áserine ońaı túsedi»,-deıdi Tımýr Qarjaýbaev.

Mamandardyń sózinshe, esirtki qylmysyna qatysqan azamattar kemi 10 jylǵa sottalady.

Buǵan deıin Pavlodarda er adamnan 8,5 kılogramm esirtki tabylǵany týraly jazǵanbyz.