Esirtki bıznesi men kıberqylmys: Qazaqstan halyqaralyq áriptestikti kúsheıtpek
ASTANA. KAZINFORM — Qazaqstannyń Іshki ister mınıstri Erjan Sadenov Aýstrııa astanasynda ótken BUU-nyń transulttyq uıymdasqan qylmysqa qarsy konventsııasyna qatysýshy memleketter konferentsııasynyń 13-sessııasyna qatysty, dep habarlaıdy Polisia.kz.
Halyqaralyq forým uıymdasqan qylmysqa, esirtki trafıgine, adam saýdasyna jáne zamanaýı kıberqaýipterge qarsy birlesken sharalardy talqylaý úshin 130-dan astam memlekettiń ókilderin biriktirdi.
Konferentsııa barysynda Qazaqstan delegatsııasy halyqaralyq qaýipsizdiktiń negizgi máseleleri men quqyq qorǵaý organdary arasyndaǵy yntymaqtastyqty nyǵaıtý jónindegi el ustanymyn tanystyrdy.
Sapar aıasynda mınıstrdiń BUU jáne Aýstrııa basshylyǵymen ekijaqty kezdesýleri de mańyzdy oryn aldy. BUU Bas hatshysynyń orynbasary — BUU-nyń Esirtki jáne qylmys jónindegi basqarmasynyń atqarýshy dırektory Monıka Djýmamen kezdesýde kıberqaýipterge, esirtki bıznesine jáne transulttyq qylmysqa qarsy is-qımyl máseleleri talqylandy.
BUU qoldaýymen qarasha aıynda Astana qalasynda ótetin kıberqylmysqa qarsy kúres jónindegi halyqaralyq konferentsııaǵa daıyndyq máselesine erekshe nazar aýdaryldy.
Sondaı-aq Erjan Sadenov Aýstrııanyń Federaldyq ishki ister mınıstri Gerhard Karnermen kelissózder júrgizdi.
Taraptar kóshi-qon salasyndaǵy ózara is-qımyl, quqyq buzýshylyqtardyń aldyn alý, ozyq tájirıbe almasý, zamanaýı polıtsııa tehnologııalaryn engizý, sondaı-aq eki eldiń ishki ister mınıstrlikteri arasyndaǵy yntymaqtastyqty odan ári keńeıtý perspektıvalaryn talqylady.
Ótkizilgen kezdesýler halyqaralyq áriptestikti nyǵaıtýǵa, qylmysqa birlesip qarsy turýǵa jáne jazanyń bultartpastyǵyn qamtamasyz etýge múmkindik beredi.
Buǵan deıin ІІM JSN-di ózgertýge qatysty aqparatqa túsinikteme berdi.
