ESPN Golovkın - «Kanelo» úshinshi jekpe-jegi ótetin kúndi atady

NUR-SULTAN. QazAqparat - ESPN Deportes málimetinshe, Gennadıı Golovkın men Saýl «Kanelo» Alvares arasyndaǵy jekpe-jekter trılogııasynyń sońǵy bóligi bıylǵy jyldyń qyrkúıeginde ótýi múmkin, dep habarlaıdy Sports.kz.

Alaıda Golovkınniń meksıkalyq sportshy Haıme Mýngııamen mamyr aıynda josparlanǵan aıqasynda basym túsýi bunyń mindetti sharty bolyp otyr. Atalǵan judyryqtasýdyń jeńimpazy rıngte Alvareske qarsy shyǵý múmkindigin aıtarlyqtaı arttyrady.

«Eger Golovkın (Mýngııamen aıqasta) jeńse, qyrkúıekte «Kanelomen» úshinshi jekpe-jektiń ótkizilýine qol jetkizedi, al eger Haıme jeńse, bul bolashaqta «Kaneloǵa» qarsy shyǵa alatyn jańa juldyzdyń janǵany», - dep jazdy jýrnalıst Salvador Rodrıges.

Golovkın-Mýngııa arasyndaǵy jekpe-jektiń ótkizilýine boksshylardyń taraptary da, DAZN strımıngtik qyzmeti de qyzyǵýshylyq tanytyp otyr.