EO men Ońtústik Amerıka elderi eń iri saýda kelisimine qol qoıdy

ASTANA. KAZINFORM – Eýropalyq odaq pen Ońtústik Amerıkadaǵy Merkosýr blogy elderi aýqymdy saýda kelisimine qol qoıdy. Bul kelisim ES tarıhyndaǵy eń iri saýda kelisimi bolyp sanalady. Merekelik rásim 2026 jylǵy 17 qańtarda Paragvaıdyń astanasy Asýnsonda ótti, dep habarlaıdy DW.

Kelisimge Eýropalyq odaq pen Merkosýr elderi — Brazılııa, Argentına, Paragvaı jáne Ýrýgvaı ókilderi qol qoıdy. Bul qujat ES-tiń 27 memleketi men Ońtústik Amerıka elderiniń naryǵyn biriktirip, álemdegi eń iri erkin saýda aımaqtarynyń birin qurýǵa múmkindik beredi.

Eýropalyq taraptan rásimge Eýropalyq keńestiń tóraǵasy Antonıý Koshta jáne Eýropalyq komıssııanyń tóraıymy Ýrsýla fon der Lıaıen qatysty.

— Biz baj salyǵyn emes, ádil saýdany tańdaımyz, oqshaýlaný emes, ónimdi uzaq merzimdi seriktestikti tańdaımyz, — dedi Ýrsýla fon der Lıaıen.

Іs-sharaǵa Paragvaı, Argentına, Ýrýgvaı, Bolıvııa, Panamanyń prezıdentteri jáne Brazılııanyń syrtqy ister mınıstri de qatysty.

Kelisim boıynsha kelissózder 2000 jyly bastalyp, 25 jylǵa sozyldy. Qujat taraptar arasyndaǵy uzaq ýaqytqa sozylǵan kelissózderdiń nátıjesi bolyp, álemdik saýdadaǵy mańyzdy ózgerister kezeńinde daıyndaldy.

Jańa saýda kelisimi Eýropa men Ońtústik Amerıka elderi arasyndaǵy saýda-ekonomıkalyq yntymaqtastyqty keńeıtýge qosymsha múmkindikter ashady.

Eske salsaq, buǵan deıin ES elderi Merkosýr blogymen saýda kelisimin bekitken bolatyn.