Esmuqan Obaevtyń 70 jyldyq mereıtoılyq keshi ótedi
ALMATY. 21 qazan. QazAqparat /Erlik Erjanuly/ - Almatyda 22 qazan kúni Qazaqtyń memlekettik Muhtar Áýezov atyndaǵy akademııalyq drama teatrynyń kórkemdik jetekshisi jáne dırektory Esmuhan Obaevtyń 70 jasqa tolýyna arnalǵan mereıtoılyq kesh ótedi.
Kesh qarsańynda rejısser Jánibek Jetirýdyń Qazaqstannyń eńbek sińirgen óner qaıratkeri, Qazaqstannyń halyq artısi, Memlekettik syılyqtyń ıegeri, táýelsiz «Tarlan» syılyǵynyń laýreaty, «Parasat» ordeniniń ıegeri, Qazaqtyń T.Júrgenov atyndaǵy ulttyq óner akademııasynyń professory, Qazaqstan teatr qaıratkerleri odaǵynyń basqarma múshesi, Túrkitildes elder Ulttyq teatrlary Dırektorlar keńesiniń múshesi E. Nesipbaıuly týraly derekti fılmniń tanystyrylymy bolady. Fılmniń stsenarııin jazǵan pýblıtsıst, synshy jáne jazýshy Álııa Bópejanova. Ony Sháken Aımanov atyndaǵy «Qazaqfılm» kınostýdııasy men «Jańa ǵasyr» stýdııasy birlesip túsirgen. Mereıtoı ıesiniń aıtýynsha, bul ádettegideı ómirbaıandyq emes, pýblıtsıstıkalyq saryndaǵy týyndy bolmaq. Uzaqtyǵy 52 mınýt bolatyn fılmde Esmuhan Obaevtyń rejısser jáne qaıratker retindegi qalyptasý jolyna taldaý jasalmaq. Sondaı-aq «Óner» baspasynan «Áıgili adamdar» serııasymen jaryq kórgen «Rejısser Esmuhan Obaev» dep atalatyn jańa kitaptyń tusaýkeseri ótpek.
