Esimimdi «Sultanbek aǵamnyń aty óshpesin» dep ákem qoıǵan – Sultanbek Qojanov
TÚRKІSTAN. KAZINFORM – Kentaý qalasynda Alashtyń arysy Sultanbek Qojanovtyń 130 jyldyǵyna oraı «Sultanbek Qojanov jáne ulttyq memleket qurý ıdeıasy: tarıhy men búgingi tájirıbeleri» atty respýblıkalyq ǵylymı-tájirıbelik konferentsııa ótti.
Memleket jáne qoǵam qaıratkeri, alashtyń arda uly Sultanbek Qojanovtyń esimin ulyqtaý maqsatynda atqarylyp jatqan jumystardyń barysymen tanystyrǵan Kentaý qalasynyń ákimi Jandos Tasov konferentsııa jumysyna sáttilik tiledi.
Al, tarıh ǵylymdarynyń doktory, professor Hazretáli Tursun «Sultanbek Qojanovtyń tergeý hattamalaryna ǵylymı taldaý», Ózbekáli Jánibekov atyndaǵy Ońtústik Qazaqstan pedagogıkalyq ýnıversıtetiniń dotsenti Narıman Nurpeıis «Sultanbek Qojanov - ádebı mura janashyry», Qazaqstan Jýrnalıster Odaǵynyń múshesi Sultanbek Qojanovtyń jıen nemeresi Gúlsara Qablanova «Ata-anamnyń estelikterindegi Sultanbek Qojanov beınesi» taqyryptarynda keń kólemdi baıandama jasady. Aıtysker aqyn, Memlekettik «Daryn» syılyǵynyń ıegeri Bekarys Shoıbekov pen respýblıkalyq «Altyn qalam» baıqaýynyń laýreaty Dilda Nurmahanbetova arnaý aıtty.
Búginde Kentaý qalasynda halqy úshin týǵan qaıratker Sultanbek Qojanovtyń urpaqtary turady. Sonyń biri alash arysynyń kishi inisi Seıdollanyń kenje balasy, atasynyń atyn ıemdengen Sultanbek Qojanov.
Kentaý transformator zaýytynda qyzmet atqaratyn Sultanbek búginge deıin ákesi men atasy jaıly birshama málimetterdi jınaǵan. Kitap jazdyryp ta, kópshilikke usyndy. Endigi maqsaty - atasy men ákesi týraly tyń derekterdi tolyqtyryp, eńbegin nasıhattaý.
«Meniń atymdy: «Sultanbek aǵamnyń aty óshpesin, umytylmasyn», dep ákem qoıǵan eken. Búginde ózim de ul-qyz ósirip otyrmyn. Nurdáýlet, Nurasyl, Albına, Álııa esimdi ul-qyzdarym bar. Olar da atalary jaıly óleńderdi, qarasózderdi jattap alǵan. Mektebinde úlken maqtanyshpen aıtyp júredi. 31 mamyr – saıası qýǵyn-súrgin qurbandaryn eske alý kúninde jáne atam men ákemniń qaıtys bolǵan kúnderinde aǵaıyn-týysty jınap, arýaǵyna jyl saıyn quran baǵyshtap turamyz. Atam Sultanbek Qojanovtyń jerlengen jeri Máskeý shetindegi «Kommýnarka» zıratynan tabylǵanda áýletimizben qatty qýandyq. Eldi jınap as berdik. Arnaıy delegatsııa týǵan jeri Aqsúmbeniń topyraǵyn zıratyna salyp keldi. Keıinnen kitap shyǵardyq. Endigi armanym- atam men ákemniń ómirinen syr shertetin kıno túsirý», – deıdi atasymen attas Sultanbek Qojanov.
Konferentsııa sońynda alash arysynyń eńbegin zerttep, nasıhattap júrgen ǵalymdar men zııaly qaýym ókilderi Sultanbek Qojanovtyń 130-jyldyq tósbelgisimen marapattaldy.
