Esilden artylǵan sýdy Aralǵa buratyn arna salý úshin 324 mlrd teńge kerek
ASTANA. KAZINFORM – Tasqyn kezderinde Esil ózeniniń basseıninen artylǵan sýdy Torǵaı ózeni arqyly Aralǵa baǵyttaý úshin jalpy uzyndyǵy 277 shaqyrym bolatyn úsh kanal salynýy múmkin.
Qazir arnaıy konsýltatıvtik organ osy jobanyń qanshalyqty tıimdi bolatynyn zerttep jatyr.
Bul týraly Premer-mınıstrdiń orynbasary Qanat Bozymbaevtyń Májilis depýtatynyń saýalyna joldaǵan jaýabynda aıtylǵan.
- «Kaspıı-Aral basseıniniń ekojúıesin qalpyna keltirý jáne sý tasqynyn basqarý jónindegi halyqaralyq qory» korporatıvtik qorynyń tapsyrysy boıynsha «Esil ózeniniń orta aǵysyndaǵy sý tasqynyn basqarý jáne aǵynnyń bir bóligin Torǵaı ózeni men Aral teńizi basseınine burý» jobasynyń tehnıkalyq-ekonomıkalyq negizdemesi ázirlendi. Jobaǵa kiretin qurylys-montaj jumystarynyń jalpy quny 324,4 mlrd teńge bolady, - dep jazady Qanat Bozymbaev.
Joba aıasynda 3 ýchaskeden turatyn kanaldyń qurylysy qarastyrylǵan:
«Esil-Torǵaı» – uzyndyǵy 42 km;
«Qaraqol-Saryózen» – uzyndyǵy 52 km;
«Shalqarteńiz-Aral» – uzyndyǵy 183 km.
- Atalǵan jobany iske asyrý aıtarlyqtaı qarjylyq shyǵyndardy qajet etetinin atap ótken jón. Joba Esil ózeni basseınindegi tasqyn sýlardy Torǵaı ózeni basseınine burýdy qarastyrady. Bul Shalqar-Teńiz kóliniń gıdrologııalyq rejımin qalpyna keltirýge múmkindik beredi. Qazirgi tańda Sý resýrstary jáne ırrıgatsııa mınıstrligi sýdy basseınder arasynda qaıta bólý máselelerin keshendi zerttep jatyr. Joba materıaldary mınıstrlik janyndaǵy ǵylymı-tehnıkalyq keńestiń qaraýyna usynylady. Ǵylymı-tehnıkalyq keńestiń usynystary men qorytyndylary negizinde Úkimet jobany ári qaraı iske asyrýdyń oryndylyǵy týraly sheshim qabyldaıdy, - delingen jaýapta.
Búgin 2024 jyldyń qazanynan osy jyldyń qańtaryna deıin Soltústik Aral teńizine 1 mıllıard tekshe metr sý jiberilgeni belgili bolǵan edi.