Sapserfıngte sap qurý – elordalyqtardy Esil jaǵalaýyna tartqan qandaı trend

Esilde aptasyna júzdegen adam sapbordqa minedi

Esil jaǵalaýyna kóz salsańyz, sý taqtasyna otyryp, ózen betinde eskek esip júrgen jandardy jıi baıqaýǵa bolady. Áleýmettik jelide de sapserfıng týraly vıdeolar jıi kezdesedi. Qaıyqqa uqsaıtyn, biraq jan-jaǵy qorshalmaǵan bul taqta — sapbord. Al onyń ústinde turyp nemese otyryp, eskekpen sýda qozǵalý sapserfıng nemese SUP-bordıng dep atalady.

Sońǵy eki jylda bul sport túri elde keńinen taralyp, oǵan jas ta, kári de qyzyǵýshylyq tanyta bastaǵan. Ásirese, áýesqoılar tabıǵat aıasynda demalyp, sýda sapbordpen júzýdi unatady.

Al sapserfıngti úırengisi keletinderge baǵyt-baǵdar berip, arnaıy týr uıymdastyratyndar da az emes. Solardyń biri — Qýanysh Tilepbergen. Ol kún saıyn eki saǵattan asatyn týrlar ótkizedi. Onyń aıtýynsha, bıylǵy jazǵy maýsymda uıymdastyrǵan sapserfıng týrlaryna 1500-den astam adam qatysqan.

- Táýligine bes ret, árqaısysynda alty adamnan sapbordpen sýǵa shyǵamyz. Kelýshiler sany aptasyna 100-den asady. Sáýir aıynan tamyzǵa deıin 1500 adam keldi. Maýsym aıaqtalǵansha bul kórsetkish 2000-nan asady dep oılaımyn. Bıyl kelýshilerdiń sany óte kóp. Ásirese, maýsym aıynda kelýshiler sany joǵary boldy. Sebebi bul — jazdyń basy, oqýshylardyń jazǵy kanıkýly bastalatyn kez, - deıdi nusqaýshy.

Bul — bir ǵana uıymdastyrýshynyń esebi. Al elordada sapserfıngke arnalǵan týrlar jeterlik. Sondyqtan bul sportqa qyzyqqandardyń jalpy sany budan áldeqaıda kóp dep topshylaýǵa ábden bolady.

Sapbord ústindegi erkindik

Esil ózeni sapserfıngpen aınalysatyndar úshin óte qolaıly. Sýy tunyq, tolqyny baıaý. Qalanyń kórinisi de kóz tartady. Jalǵyz qalyp, tynyshtyqta demalǵysy kelgen jandar úshin taptyrmas sport túri.

Júzýdi bilý de mindet emes — qorǵanys jıletin kıip, nusqaýshynyń aıtqanyn muqııat tyńdasańyz jetkilikti. Al tepe-teńdikti saqtap, qaýipsizdik erejelerin eskergen adam sapqa nebári bes mınýttyń ishinde-aq turyp kete alady. Muny 49 jastaǵy Beıbit Jantasovanyń tájirıbesi de dáleldeıdi.

- Sapserfıngke kelý kópten bergi armanym edi. Búgin sol armanym oryndaldy. Sýǵa eki saǵatqa tústik. Jattyǵýlardy qaıtalap, bir sátte-aq taqta ústinde erkin turyp kettim. Eshqandaı qıyndyǵy joq eken. Tabıǵat aıasynda demalyp, sergip qaıtýǵa keremet. Ásirese, tolqyn bolǵan kezde adrenalın bólinip, erekshe áser syılaıdy, - dedi ol.

Al 46 jastaǵy Zalına Qońyratovany sapserfıngke qyzy ertip kelgen. Taqtaǵa alǵashynda qorqyp mingen ol áp-sátte-aq boıyn úıretip, eskegin erkin ese bastapty.

- Men qyzymmen keldim. Negizi, basynda qorqynyshty boldy. Biraq sýǵa túsken kezde adrenalın keremet kúsh beredi eken. Óte unady. Jaı júrgen kezde qorqynyshty bolǵanymen, óziń eskek esip ketken kezde qoryqpaıdy ekensiń. Tolqyndardy da erkin ótýge bolady. Uldaryma, joldasyma da aıtý kerek, olarmen de kelý kerek. Hobbı retinde óte keremet eken, - dedi ol.

Kún batar shaqta sapserfıngke suranys arta túsedi. Kókjıek qyzǵylt túske boıalǵan sátte kelýshilerdiń kóbi ádemi sýretke túsip qalýǵa asyǵady. Al keıbiri sapbord ústinde otyryp, sý betindegi tynyshtyqty sezinip, tabıǵat kórinisin tamashalaıdy.

— Búgin sapqa birinshi ret mindim. Keremet energııa aldym. Teplohodtar ótken saıyn tolqyn paıda bolady. Sol kezdegi adrenalınniń sezimi erekshe eken. Barlyq jasty sapserfıngke shaqyrar edim. Ózim de osynda ár jeti kelip turýdy qalaımyn. Barlyq artyq oıdy umytyp, erkindik sezimine bólenýge bolady. Quddy bir sanańdy tazartqandaı bolasyń, — dedi Alına Qońyratova.

Bul sportpen aınalysýǵa turǵyndarǵa eshteńe kedergi emes. Biri balasyn ertip kelse, endi biri súıikti ıtin sap taqtasyna otyrǵyzyp, birge serýendep júr.

Jalpy, sapserfıngke kelýshilerdiń jasy 18-den 65 jasqa deıin. Nusqaýshynyń aıtýynsha, bul sport túrin ata-ájeler de ermek etedi. Tipti tań atyp, kún shyǵar sátte sapserfıngke shyǵýdy josparlap keletinder de bar.

Sapserfıngtiń paıdasy, sapbordtyń baǵasy

Úrlemeli sapbordtyń salmaǵy 5-8 kelideı bolady. Kásibı deńgeıine qaraı onyń uzyndyǵy da ózgeredi. Uzyndyǵy úsh metrden asatyn sapbordtarǵa eki-úsh adamǵa deıin otyrýǵa bolady. Al baǵasy 80 myń teńgeden bastalyp, bir mıllıon teńgege deıin jetedi.

Bir qyzyǵy, sapserfıngtiń «jabaıy sapserfıng» dep atalatyn túri de bar. Munda kásipqoılar tolqyndarmen talasa syrǵanap, erekshe áser alady.

 - 2023 jyly sapbordpen kásibı túrde aınalysatyn sanaýly ǵana adam bolsa, bıyl olardyń sany 500-ge jýyqtady. Degenmen, bizge kóbine jańadan bastaǵandar keledi. Bizde tájirıbeli, kásibı deńgeıdegi adamdarǵa arnalǵan «jabaıy sapserfıng» baǵyty da bar. Onda tolqyndar áldeqaıda joǵary. Ártúrli burylystar jasap, sapbordty kóterip aýysý, tipti sýda júzip ótý sııaqty elementterdi oryndaýǵa bolady, - dedi nusqaýshy.

Bul sport túrinde de bulshyqetter belsendi jumys istep, júrek-qan tamyr júıesi saýyǵady. Nusqaýshynyń aıtýynsha, sapserfıngpen bir saǵat jattyǵý 500 kalorııaǵa deıin joıýǵa múmkindik beredi. Sondyqtan ol artyq salmaqtan arylýǵa da kómektesedi.