Esil ózeninen tabylǵan er adamnyń kim ekeni anyqtaldy
ASTANA.KAZINFORM – Áleýmettik jelilerde Esil ózeniniń boıynan er adamnyń máıiti tabylǵany týraly aqparat tarady. Osy oqıǵaǵa qatysty Astana qalasynyń Polıtsııa departamenti túsinikteme berdi.
Vedomstvonyń málimetinshe, atalǵan derek boıynsha qylmystyq is qozǵalǵan. Polıtseıler marqumnyń jeke basyna qatysty málimetterdi anyqtady. Ol 56 jastaǵy elorda turǵyny bolyp shyqty.
– Marqumnyń denesinen zorlyq-zombylyq belgileri anyqtalǵan joq. Qazirgi ýaqytta qajetti tergeý amaldary júrgizilip, oqıǵanyń mán-jaıy anyqtalyp jatyr, – dep habarlady Astana qalasynyń Polıtsııa departamenti.
Buǵan deıin Esil ózeninen er adamnyń máıiti tabylǵanyn jazǵan edik.
Sondaı-aq Qyzylordada birneshe kún buryn joǵalǵan 65 jastaǵy er adamnyń máıiti tabyldy.
Aıta keteıik, Qazaqstanda máıitti kompıýterlik tomografııa arqyly zertteý engiziledi.
