Esil ózeninde qamystan jasalǵan baýlar ne sebepti ornatylǵany belgili boldy
ASTANA. KAZINFORM — Astanada Esil ózenindegi bıoalýantúrlilikti saqtaý jumysy júrgizilip jatyr, dep habarlaıdy elorda ákimdiginiń resmı saıty.
Jumysty «Esil-Astana» keme qatynasy kompanııasynyń mamandary oryndap jatyr. Olardyń aıtýynsha, qalyń muz ben qardyń saldarynan sýda otteginiń mólsheri azaıyp, bul balyqtardyń qyrylýyna ákelýi múmkin.
— Biz sýdy ottegimen qanyqtyrýǵa, muz astynda jınalatyn zııandy gazdardy shyǵarýǵa jáne sý aıdynyndaǵy turaqty ottegi rejımin saqtaýǵa múmkindik beretin aeratsııa jumysyn júrgizip jatyrmyz. Sonymen qatar, kóktemgi kezeńde mundaı sharalar tabıǵı ekologııalyq tepe-teńdikti qalpyna keltirýge jáne paıdaly bıologııalyq úderisterdiń jandanýyna yqpal etedi. Jumystardy oryndaý úshin arnaıy jabdyqtar qoldanylady: muz burǵylary, saǵatyna 80 tekshe metrge deıin ónimdiligi bar motopompalar, armırlengen shlangiler. Іs-sharalarǵa jeti maman men eki qyzmettik avtokólik tartylǵan, — dedi elordalyq Qorshaǵan ortany qorǵaý jáne tabıǵatty paıdalaný basqarmasynyń qyzmetkeri Janar Sádýaqasova.
Sonymen qatar mamandar qamysty oryp, ony oıyqtarǵa ornatý jumysyn da júrgizip jatyr, bul sýdyń ottegimen qosymsha qanyǵýyna yqpal etedi.
— Qazir qamystan jasalǵan baýlar ornatyldy. Jumys ózenniń tórt ýchaskesinde aıaqtaldy: «Arqar» kópirinen «Maral» kópirine deıin, «Qaraótkel» kópirinen «Atyraý» jaıaý júrginshiler kópirine deıin, «Serýen» jaıaý júrginshiler kópirinen «Tulpar» kópirine deıin, sondaı-aq «Tulpar» kópirinen gaz jabdyqtary aýdanyna deıin. Barlyǵy 16 oıyq, 840 tesik jáne 32 muzoıyq jasaqtaldy, — dep qosty basqarma ókili.
Júrgizilip jatqan sharalar Esil ózenindegi ottegi rejımin jaqsartýǵa, bıoalýantúrlilikti saqtaýǵa jáne sý tirshiligi úshin qolaıly jaǵdaı jasaýǵa múmkindik beredi.
Buǵan deıin SQO-da balyq aýlaý tártibin buzǵandarǵa byltyr 1,8 mln teńge aıyppul salynǵanyn jazdyq.