Esil ózeni nege tartyldy — Astana ákimdiginiń jaýaby
ASTANA. KAZINFORM — Esil ózeniniń sýy aıtarlyqtaı tartylyp, keıbir ýchaskelerde sý deńgeıi ádettegi normadan tómendegen. Bul jaǵdaıdyń fotosýretteri áleýmettik jelilerde jarııalandy. Ózgeristiń sebebi nede jáne sý deńgeıi qashan qalpyna keledi — osy máselelerdi anyqtaǵan edik.
Qala turǵyndary Threads áleýmettik jelisinde ózenniń tartylǵanyn kórsetetin sýretter jarııalap, bul jaǵdaıdy talqylaı bastady. Atap aıtqanda, Kenesary kóshesiniń basynan Beısekov kóshesine qaraı sozylǵan ýchaskede sý deńgeıiniń aıtarlyqtaı tómendegeni kópshiliktiń nazaryn aýdardy.
— Ózenimiz serýendeýge ketipti, biraq qaıtyp oralýǵa ýáde bergen sııaqty, — dep jazdy Threads qoldanýshysy.
Sondaı-aq, architecture_astana akkaýntynda ózen aıaq astynan tartylǵany týraly jazba jarııalandy.
— Esil ózeniniń sýy kenetten tartyla bastady. Kenesary kóshesiniń basynan Beısekov kóshesine deıingi ýchaske taıyzdap ketti. Ázirge buǵan ne sebep bolǵany belgisiz, — delingen jazbada.
Jazbaǵa qaldyrylǵan pikirlerde de turǵyndar sý deńgeıiniń sumdyq tómendegenin jazdy.
— Balalar rezeńke etik kıip júr, — dep jazdy jeli qoldanýshylarynyń biri.
Ózen sýynyń tartylý sebebin anyqtaý úshin Astana ákimdigine júgindik. Vedomstvo málimetinshe, Qurylys basqarmasy Esil ózeninde retteýshi bógettiń besinshi kezegin salý boıynsha josparly jumystardy aıaqtaǵan. Jınalǵan sý eski arna arqyly burylǵan.
— Sý basý jaǵdaılary tirkelgen joq. Jaǵdaı baqylaýda, — dep habarlady ákimdik.
Sý deńgeıi qashan kóteriletini týraly suraqqa vedomstvo ókilderi shamamen tórt-bes kún qajet bolatynyn aıtty.
Aıta keteıik, buǵan deıin Esil ózeniniń boıynda biryńǵaı qoǵamdyq keńistikter salynatynyn jazǵanbyz.
