«Esil» komandasy voleıboldan Qazaqstan chempıonatynyń qola júldegeri atandy

PAVLODAR. KAZINFORM — Pavlodarda voleıboldan erlerdiń Ulttyq lıga komandalary arasynda HHH Qazaqstan chempıonatynyń qola júldegeri anyqtaldy. 

Úshinshi oryndy sarapqa salý úshin alańǵa «Esil» (SQO) men «Atyraý» komandalary shyqty.

Keshe soltústikqazaqstandyqtar 3:0 esebimen jeńgen bolatyn. Alekseı Terenınniń komanda kapıtany Aleksandr Sýleımanov bastaǵan shákirtteri búgin de sheberliginiń basym ekenin anyq baıqatty – 3:0 (25:13, 25:21, 25:17).

«Ótken jyly besinshi oryndy qanaǵat tutsaq, bıyl qola júldege qol jetkizdik. Jalpy, maýsym barysynda túrli týrnırlerde úsh medal aldyq. Bul maýsymnyń tabysty ótkenin bildiredi. Kelesi chempıonatqa da muqııat daıyndalamyz. Petropavl qalasynda sport saraıy salynyp jatyr. Bálkim, aldaǵy maýsymda Ulttyq lıganyń týryn qabyldap qalarmyz», - dedi A.Terenın.

Pleı-off kezeńinde favorıt sanalǵan Oraldyń «Jaıyǵyn» jeńip, sensatsııa jasaǵan «Atyraýdyń» bas bapkeri ıÝrıı Labetskıı bul joly jas oıynshylarǵa úmit artqanyn aıtty.

Besinshi oryn úshin básekede «Jaıyq» «Jetisý jastaryn» 3:0 (25:17, 25:16, 25:13) esebimen aıqyn basymdylyqpen jeńdi. «Jaıyqtyń» kapıtany, Oral voleıbolynyń túlegi Vıtalıı Vorıvodın óz klýby sapynan úzdik oıynshy atandy. 

«Árıne, biz «Atyraýmen» pleı-off básekesinde óz múmkindigimizdi paıdalana almadyq, bári óz qolymyzda boldy. Múmkin bolǵan eki-úsh upaıdy alsaq, 3:0 esebimen jeńip, júldeli oryndar úshin talasar edik. Degenmen baryn salǵan shákirtterime rızashylyǵymdy bildiremin», - dedi «Jaıyqtyń» bas bapkeri Vıktor Kozık. 

Almatynyń «Býrevestnıgin» 3:2 (22:25, 21:25, 25:19, 25:16, 16:14) esebimen tize búktirgen «Aqtóbe» birinshilik qorytyndysynda 7-orynǵa turaqtady.

Búgin altyn júlde úshin «Pavlodar» men «Taraz» ekinshi kezdesýin ótkizedi. Eger pavlodarlyqtar jeńse, chempıon atanady.

Eske sala keteıik, budan buryn voleıboldan Qazaqstan chempıonatynda «Pavlodar» altyn úshin talasta «Tarazdy» qapy qaldyrǵanyn jazǵan bolatynbyz.