Esil boıyndaǵy Buzylyq qarymta rettegishin salýǵa 120 mlrd teńge qajet
ASTANA. KAZINFORM – Premer-mınıstrdiń orynbasary Qanat Bozymbaev Májilis depýtatynyń saýalyna joldaǵan jaýapta memleket Esildiń arnasynan asqan sýdy kóktem men kúzde qalaı retteıtini aıtylǵan.
- Sý salasyn damytýdyń 2024 – 2028 jyldarǵa arnalǵan keshendi jospary boıynsha Esil ózeninde qarymta rettegish salý (Buzylyq) josparlanǵan. Esil qarymta rettegishi 800 mln tekshe metrden tasqyn sý men qar sýyn jınaqtap, retteıdi, - dep jazylǵan jaýapta.
Qanat Bozymbaev bul gıdronysan etektegi Sergeev jáne Petropavl sý qoımalarynyń jumysyn turaqtandyrýǵa qoldanylatynyn aıtady.
- Jobalyq-smetalyq qujattamany ázirleý jumystary 2024 jyldyń qarasha aıynda aıaqtalyp, memlekettik saraptamaǵa jiberildi. Saraptama qorytyndysy 2025 jyldyń naýryz aıynda beriledi dep belgilengen. Qurylys-montajdaý jumystarynyń jalpy quny shamamen 120 mlrd teńge bolady. Jobany iske asyrý merzimi 2026–2028 jyldar, - dep jazady vıtse-premer.
Buǵan deıin Oral qalasy men Qaratóbe aýdanynyń ákimderine tasqynǵa qarsy jumysty jóndi júrgizbegeni úshin sógis jarııalanǵan edi.