Esil basseıniniń sý aıdyndarynda balyqtyń keı túrlerin aýlaýǵa ýaqytsha tyıym salynady

PETROPAVL. KAZINFORM — Bul tyıym balyqtardyń ýyldyryq shashýyna baılanysty engizilgen. 

Soltústik Qazaqstan oblysy tabıǵı resýrstar jáne tabıǵat paıdalanýdy retteý basqarmasynyń málimetinshe, Esil basseıniniń sý aıdyndarynda 15 sáýirden bastap 15 mamyrǵa deıin shortan, aqqaıran jáne kókserkeni aýlaýǵa bolmaıdy.

Al 20 mamyrdan bastap sazan (tuqy) balyǵyn, 1 tamyzdan 14 qyrkúıekke deıin gammarýsty, 1 naýryzdan 15 maýsymǵa deıin artemııa tsıstasyn jáne 1 maýsymnan 15 shildege deıin ózen shaıandaryn aýlaýǵa tyıym salynady.

Sondaı-aq, oblys sheginde Esil, Nura, Sileti ózenderinde jáne olardyń barlyq salalary men sý qoımalarynda 20 sáýirden 20 mamyrǵa deıin balyq aýlaýǵa ruqsat joq.

Rezervte turǵan sý aıdyndarynda áýesqoı balyqshylarǵa joldamasyz-aq balyqty qarmaqqa, spınnıngke aýlaýǵa bolady, biraq bir balyqshy aýlanǵan balyq salmaǵyn bes keliden asyrýǵa bolmaıdy.

Jalǵa alynǵan sý aıdyndarynda balyqshy jalǵa alýshynyń bergen joldamasymen ǵana balyq aýlaı alady. Tek qarmaq jibinen jasalǵan «órmekshi», «oramal» jáne t. b. sııaqty balyq aýlaý quraldaryn áýesqoı balyq aýlaýdyń barlyq túrinde qoldanýǵa tyıym salynady, bul tabıǵatty qorǵaý zańnamasyna da qaıshy.

Mamandar sý qoımalarynda, júzý quraldaryn qoldanǵan kezde qaýipsizdik sharalaryn saqtaýdy, qoqys pen turmystyq qaldyqtardy jınap ketý qajettigin, ot jaǵý kezinde órt qaýipsizdigi sharalaryn saqtaýdy eskertedi.

Buǵan deıin SQO Aralaǵash aýylynyń mańyndaǵy kanalda balyq qyrylyp jatqanyn jazdyq.