Esil basseıninde sý zańnamasyn buzǵandarǵa 12 mln teńgege jýyq aıyppul salyndy
PETROPAVL. KAZINFORM — Esil ózeniniń sý sharýashylyǵy basseıninde jyl basynan beri sý resýrstaryn paıdalaný talaptarynyń saqtalýyna qatysty 47 ákimshilik is qozǵaldy.
Esil basseındik sý ınspektsııasynyń málimetinshe, ákimshilik isterdiń 37-si boıynsha jalpy somasy 11,8 mln teńge aıyppul salyndy. Taǵy alty is boıyna materıaldar sottyń qaraýyna jiberildi.
Mamandardyń aıtýynsha, sý paıdalanýshylar arnaıy nysandardan sý alý tártibin saqtaýy qajet, ıaǵnı, sý qoryn paıdalaný men qorǵaý salasyndaǵy óndiristik baqylaýdy, sýdy esepke alý aspaptaryn ornatýdy, sý kólemin baqylaýdy júzege asyrýy qajet. Bul QR Sý kodeksiniń 53-babynda kórsetilgen.
Al Ákimshilik quqyq buzýshylyq týraly kodekstiń 141-baby 2-bóligi boıynsha — Sý kodeksinde kórsetilgen erejelerdi, baqylaý talaptaryn saqtamaı, ózine bekitilgen lımıtten artyq sý alsa nemese sý paıdalanýdyń belgilengen sharttary men tártibin saqtamasa aıyppul qarastyrylǵan. Bıyl osyndaı 23 ákimshilik is qozǵalyp, 4 mln teńge shamasynda aıyppul salynǵan.
— Baqylaý tek sý paıdalanýshylarmen shektelmeıdi. Sý qoryn qorǵaý jáne paıdalaný salasyndaǵy mindetterdiń jergilikti atqarýshy organdar tarapynan oryndalýy da tekseriledi. Máselen, Aqmola oblysynda júrgizilgen tekserý kezinde bir zań buzýshylyq anyqtalǵan. Nátıjesinde ÁQBtK-niń 359-1-baby 2-bóligi boıynsha ákimshilik is qozǵalyp, 648 myń teńge aıyppul salyndy. Buǵan qosa, zań buzýshylyqty joıý týraly nusqama berilip, aıyppul óndirildi, — deıdi Sý resýrstaryn retteý, qorǵaý jáne paıdalaný jónindegi Esil basseındik sý ınspektsııasy basshysynyń orynbasary Gúlden Ismaǵulova.
SQO-da qazir osy baǵytta taǵy bir tekserý qazir jalǵasyp jatyr. Onyń nátıjesi boıynsha qorytyndy sheshim ázirge qabyldanǵan joq.
Buǵan deıin sý únemdeý maqsatynda qandaı jumystar atqarylyp jatqanyn jazǵan edik.
