Esil alabynda tasqyn qaýpi 27 sáýirge deıin saqtalady – «Qazgıdromet»
ASTANA. KAZINFORM – «Qazgıdromet» respýblıkalyq memlekettik kásipornynyń baspasóz hatshysy Alına Ysmaǵulova qaı óńirlerde tasqyn qaýpi saqtalatynyn aıtty.
«Atyraý oblysyna Aqtóbe oblysynan kelip quıylatyn ózenderde sý tasqynynyń sharyqtaý shegi ótti. Boljam boıynsha, sáýirdiń úshinshi onkúndiginde, ıaǵnı, 28-29 sáýir aralyǵynda Batys Qazaqstan oblysynan tasqynnyń kezekti tolqyny keledi. Shyǵys Qazaqstan oblysynda jazyqtaǵy qardyń erýine, betkeıden sý júrýine jáne seń júrýine baılanysty tasqynynyń alǵashqy tolqyny baıqalyp otyr. Ol sáýir aıynyń ortasyna deıin jalǵasady. Batys Qazaqstandaǵy ishki ózenderdiń kóbinde tasqynnyń sharyqtaý shegi ótti. Reseı Federatsııasynyń Orynbor qalasynan Oral qalasyna sýdyń kelýine baılanysty Jaıyqta tasqynnyń sharyqtaý shegi 18-20 sáýir aralyǵynda kútiledi», - dedi ol ortalyq kommýnıkatsııalar qyzmetinde ótken brıfıngide.
Onyń aıtýynsha, Esil basseınindegi tasqynnyń ekinshi kezeńi toqsan bı gıdrobeketiniń tusynda 20 sáýirge deıin, Petropavl beketiniń tusynda 27 sáýirge deıin jalǵasady.
«Qostanaı oblysyndaǵy ózenderdiń kóbinde tasqynnyń sharyqtaý kezeńi ótip, sý deńgeıiniń tómendeýi baıqalady. Soltústik Qazaqstan oblysyndaǵy ishki ózenderdiń kóbinde tasqynnyń birinshi tolqyny sharyqtaý sheginen ótti. Esil ózenine Aqmola oblysynan qosylatyn salalardyń áserinen tasqynynyń ekinshi tolqyny bastaldy», - dedi ol.
Aqmola oblysynyń basym bóliginde sý deńgeıiniń aýytqýy jalǵasýda. Keı jerlerde sý deńgeıiniń qaýipti mejeden asyp, ózender men qar sýy eldi mekenderge, avtojoldarǵa jaıylyp jatyr», - dedi Alına Ysmaǵulova.
