Eskirgen gaz ballondary kimniń esebinen jańartylady
ASTANA. KAZINFORM – Eskirgen gaz ballondaryn jańartýǵa «Jasyl damý» qorynyń qarajaty jumsalýy múmkin.
Májilistegi gazben jabdyqtaý jáne taýarlyq gazdy únemdi tutyný máselelerine arnalǵan zań jobasynyń tanystyrylymynda qoldanystaǵy 350 myń gaz ballony jańasyna aýystyrylatyny aıtyldy.
Tótenshe jaǵdaılar mınıstrligi Ónerkásip qaýipsizdigi komıtetiniń Atom energetıkasy obektilerin jáne qaýipti tehnıkalyq qurylǵylardy qaýipsiz paıdalanýdy memlekettik baqylaý jáne qadaǵalaý basqarmasynyń basshysy Azat Taǵaev Kazinform tilshisine bergen suhbatynda atalmysh protsess halyqtyń qaltasyna salmaq salmaıdy dep sendirdi. Vedomstvo ol úshin «Jasyl damý qorynan shamamen 11,9 mlrd teńge surap otyr.
«Úkimetten aldyn ala maquldaý bar. Qazir sol tapsyrma aıasynda esepter júrgizip jatyrmyz. «Kazinjenering» kompanııasynyń aqparaty boıynsha bir ballon óndirý quny 34-38 myń teńge bolady. Jobalap aıtsaq, qoldanysta 350 myń gaz ballony bar. Ony biz bes jylǵa bólip, ár jyl saıyn 70 myń ballondy jańasyna aıyrbastap otyramyz. Úkimet osyǵan qarajat bólse, turǵyndarǵa jańa ballondardy bastapqy kezeńde tegin taratamyz. Ári qaraı qandaı mehanızm bolatynyn kóre jatamyz. Keleshekte de tegin jańartyla ma, ol belgisiz», - dedi ol.
Aıtýynsha, gaz ballondaryn jańartýǵa eki kompanııa tapsyrys alýy múmkin.
«Qazir eki kompanııa bar. Bireýi jylyna 10-15 myń ballon shyǵara alady. Ekinshisi jylyna 60 myń ballon óndire alady. Jylyna 70 myń dep otyrǵanymyz sodan. Energetıka mınıstrliginiń jumys toby bul esepterdi zerttep jatyr. Qysqartyp aıtqanda, gaz ballondaryn jańartý jumysy halyqtyń qaltasyna áser etpeýi kerek. Tek ol úshin Úkimet aqsha berýi qajet. Qazir «Jasyl damý» qorynan suratyp otyrmyz. Úkimet maquldasa, halyqtyń qaltasyna salmaq túspeıdi», - dedi Azat Taǵaev.
