ESKO anasyna arnap shyǵarǵan hıt áninen keıin ónerge qaıta oraldy
ASTANA. KAZINFORM – 11 mln qaralym jınaǵan «Mama» áninen keıin ánshi ESKO (Qýandyq Eskeldi) shyǵarmashylyǵyn jalǵastyrýǵa sheshim qabyldady. Ánshi ónerdi toqtatamyn degen oıynan tyńdarman qoldaýynyń arqasynda bas tartqanyn aıtady.
– Bul ándi anamnyń týǵan kúnine arnap jazǵanmyn. Sol ýaqytta ónerden ketemin dep naqty sheshim shyǵarǵanmyn. Biraq tyńdarmannyń júrekjardy hattary meniń ónerge qaıta oralýyma sebepker boldy, - deıdi ESKO.
Ánshi «Mama» ániniń bir kúnde jarty mıllıon, kelesi kúni mıllıonnan astam qaralym jınaǵanyn atap ótti. Onyń aıtýynsha, kópshilik ándi jaqyndarymen sóılesýge, keshirim suraýǵa, qarym-qatynasty túzetýge sebep qylǵan.
ESKO bul týyndyny anasyna arnasa, kelesi «Papa qasyńda» ánin ulyna ósıet retinde jazǵanyn jetkizdi.
– Bul ánniń sózinde «qandaı jaǵdaı bolsa da syryńdy menimen bólis, men seni bar bolǵanyń úshin jaqsy kórem» degen oı jatyr. Kez kelgen bala estigisi keletin sóz ǵoı, - dedi ol Jibek Joly telearnasyndaǵy «Bugin LIVE» baǵdarlamasynda.
Óner ıesi 16 jeltoqsanda Táýelsizdik kúnine oraı «Qulager» atty jańa ánin jarııalaıtynyn málimdedi.
Aıta keteıik, buǵan deıin ánshi ALEM-niń eksklıýzıv suhbatyn jazǵan edik.