Eski vokzal murajaıǵa aınalady
ASTANA. QazAqparat - Grekııanyń temir joldar uıymy Afına-Pelopennes jelisindegi eski stansany qaıta jańǵyrtyp, sol jerde Temir jol murajaıyn ashýǵa kiristi.
Vokzal 1884-1889 jyldary frantsýz ınjenerleriniń syzbasynyń negizinde salynǵan. Neoklassıtsızm men jańashyldyq stılderi qosylǵan eki qabatty ǵımarattyń sońǵy túpnusqasy 1913 jyly aıaqtaldy. Onyń syrt jaǵynda uzartylǵan platforma ornalasty.
Sońǵy toǵyz jyl boıy jabyq turǵan vokzalǵa Grekııanyń tarıhı-mádenı qundylyǵy degen dáreje berildi. Munda osy kezge deıin 19-ǵasyrdyń dekoratıvtik elementteri - aǵash saǵattar, gazdy shamdar, mármár alaýoshaqtar jáne basqa da zattar saqtalǵan.
Jańǵyrtýdan keıin murajaıda kórme ortalyǵy, kóp fýnktsıonaldy zal, jádigerlik dúńgirshek jáne qosymsha ǵımarattar jumys isteıtin bolady. Temir jol boıynda, sonymen birge, kórmeniń bir bóligi - vagondar men mehanızmder ornalastyrylady, dep jazady Rosbalt.
