«Eski úı» baǵdarlamasy: Almatyda 1443 úı súrilmek
ALMATY. QazAqparat - Almaty ákimdigi «Eski úı» baǵdarlamasyn júzege asyrý úshin ınvestor izdestirip jatyr. Bul týraly ákimdik ókilderi «Súıikti qalamyzdy jańartý» bıznes-forýmynda aıtty, dep habarlaıdy QazAqparat tilshisi.
Ákimdik ókilderiniń aıtýynsha, Almatyda eskirgen jáne apattyq jaǵdaıda turǵan 948 úı bar. Onyń 56-y ǵana buzylyp, ornyna jańa zamanaýı kóp qabatty úıler salyndy.
«Kapıtaldy qurylys kásiporny» JShS dırektory Ǵanı Saǵıev bul kórsetkishtiń Almaty masshtabymen salystyrǵanda az ekenin aıtty.
Endi Almaty turǵyn úılerin jańartý maqsatynda ınvestorlar tartý qolǵa alynyp otyr.
«Bıyl osy jobany júzege asyrý maqsatynda 3 iri kompanııa quny 45 mlrd teńge bolatyn kelisimshartqa otyrdy. Osy boıynsha qalada úsh iri jobany bastadyq. Biri Súleımenov kóshesiniń boıynda, al qalǵan ekeýin óz kúshimizben aıaqtaý kerekpiz. Qazirgi tańda kásiporyn Almaty kósheleriniń usqynyn ketirip turǵan úılerdi súrýge basymdyq berip jatyr» , - dedi Ǵanı Saǵıev.
Bıyl kúzden bastap apattyq jaǵdaıda turǵan úılerdiń tizimine ınventarızatsııa ótýde. Eń aldymen qosqabatty kirpish úıler men karkas pen qamystan turǵyzylǵan úıler nazarǵa ilikti.
«Biz 1443 úıdi jańartýdy kózdep otyrmyz. Bul úılerdiń syrtqy kelbeti de talapqa saı emes. Sonymen qatar, adam ómirine qaýip tóńdiretin úılerdi buzýǵa tyrysamyz. Biraq úılerdi súrý protsesi ınvestorlarmen birlesken ekonomıkalyq-qarjylyq eseptiń merzimine baılanysty bolady. Sonymen qatar, bizdiń proektegi eń úlken problema - bul úılerdiń qalanyń shetki aýdandarynda ornalasýy. Sondaı-aq, apattyq úıler jekemenshik úılerdiń qorshaýynda qalǵan. Mundaı jobalarǵa ınvestor barǵysy kelmeıdi. Qyzyl syzyqtan asqan úılerdiń kópshiligi Túrksib aýdanynda ornalasqan» , - dedi Saǵıev.
Túrksib aýdanynyń Raıymbek kóshesinen tómengi aýmaqtarynda apattyq úılerdiń ornyna bıik úı salý múmkin emes. Sondyqtan, úıdi salýǵa ketetin shyǵyn aqtalmaıdy. Satý baǵasy da tómen bolady. Sol úshin ınevstorlar bul jobalarǵa barmaıdy.
«Buryn osy baspanalar tek memlekettiń qarajatyna ǵana jańartylsa, búginde jeke qarjy tartylyp jatyr. Jekemenshik kompanııalar óz aqshasyna salady. Al memleket ákimshilik turǵydan kómektesedi. Turǵyn úıge ınfraqurylym, sý, jaryq tartyp beredi. Súleımenov kóshesiniń boıyndaǵy buzylyp jatqan úılerdiń turǵyndary men jóndeý jumystaryn ótkizip jatqan adamdarǵa ýaqytsha Jandosov kóshesiniń boıyndaǵy 40 páterdi usyndyq», - dedi kásiporyn ókili Ázirbaev Muhıt.
Aıta ketý kerek, «Eski úı» baǵdarlamasynyń arqasynda kóptegen almatylyq turǵyndar eski úıden jańa úıge kóship jatyr. Kásiporyn qos qabatty eski úılerdi súrip tastap, olardyń ornyna bıik 9-12 qabattyq úı salady. Páterlerdiń jartysy turǵyndarǵa tegin berilse, qalǵany kommertsııalyq maqsatta paıdalanylady. Osylaısha memleket salǵan qarjysyn shyǵaryp alyp otyrady.
