Eski kólikterin ótkizgen qazaqstandyqtarǵa 31 mlrd teńge tólendi
NUR-SULTAN. QazAqparat – Bes jylda 213 myńnan astam eski kólikti joıýǵa tapsyrdy. Bul týraly «ÓKM Operatory» JShS baspasóz qyzmetinen málim boldy, dep habarlaıdy QazAqparat.
«Eski kólikterdi joıýǵa qabyldaý baǵdarlamasyna 5 jyl boldy. Osy aralyqta qazaqstandyqtardan 213 983 kólik joıýǵa qabyldandy. Atap aıtqanda, onyń 193 298-i jeńil kólik, 8 027 avtobýs jáne 12 658 júk kóligi. Tozyǵy jetken kólikterin joıýǵa ótkizgen azamattarǵa 31,9 mlrd teńgeden astam qarajat tólendi. Sertıfıkat baǵdarlamasy boıynsha 54 831 avtokólik qabyldandy. Atalǵan baǵdarlamanyń nátıjesinde qazaqstandyqtar otandyq óndirýshiden 29 759 jańa avtokólik satyp aldy», - delingen taratylǵan málimette.
Sondaı-aq eskirgen aýyl sharýashylyǵy tehnıkasyn jeńildik sertıfıkatyna aıyrbastaý baǵdarlamasy boıynsha 3 045 agrotehnıka joıýǵa tapsyryldy. Onyń 801-i kombaın bolsa, 2 244 -i traktor.
2021 jyly aýyl sharýashylyǵy tehnıkasyn qabyldaýǵa 2 380 kvota bólindi. Keıin QR Investıtsııalar jáne ınfraqurylymdyq damý mınıstrligi men Ekologııa, geologııa jáne tabıǵı resýrstar mınıstrligi kelisimimen qosymsha taǵy 1000 kvota bólingen bolatyn (580 traktorǵa, 420 kombaınǵa).
Esterińizge salaıyq eski kólikti joıýǵa qabyldaý baǵdarlamasy 2016 jyldyń 21 qarashada bastalǵan bolatyn.
Al aýyl sharýashylyǵy tehnıkasyn qabyldaý baǵdarlamasy 2020 jyldyń 2 qarashasynan bastap iske qosyldy. Baǵdarlama aıasynda agrotehnıkany tapsyrýshylarǵa 560 myńnan 2 mıllıon teńgege deıin jeńildik sertıfıkaty beriledi. Al jeńil avtokólikterge 210 myń, jolaýshy jáne júk kólikteriniń sanatyna qaraı 420 myńnan 630 myń teńgege deıin baǵalanady.
Eski kólikterdi joıýǵa qabyldaý baǵdarlamasy boıynsha aımaqtardan jınalǵan mashınalar Qaraǵandy oblysyndaǵy zaýytqa jetkiziledi. Іsten shyqqan kólik quraldary sol jerde qaıta óńdeledi. Qazirgi tańda zaýyt 194 462 kólikti qaıta óńdedi.
