Eski kólik úshin 150 myń teńgege deıin ótemaqy tólenedi

ASTANA. QazAqparat - 2016 jylǵy 3 qazanda QR Energetıka mınıstrliginde normatıvtik quqyqtyq aktilerdi jetildirý, óndirýshilerdiń jáne ımporttaýshylardyń keńeıtilgen mindettemeleri qaǵıdatyn iske asyrý máseleleri boıynsha quqyq qoldaný praktıkasyn iske asyrý barysyn baqylaý jónindegi jumys tobynyń otyrysynda Qazaqstanda qutyny, elektr, elektrondyq jabdyqtardy (turmystyq tehnıkany, lıýmınestsentti jáne synapty shamdardy, sondaı-aq toqtyń hımııalyq kózin) jınaý men kádege jaratýdy, qaıta óńdeýdi kompensatsııalaý mehanızmin engizý jóninde sheshim qabyldandy.

Bul týraly QR Energetıka mınıstrliginiń baspasóz qyzmeti habarlady.

Jobany iske asyrý úshin 2016 jyly «ÓKM Operatory» JShS-yna bólingen jalpy aqsha somasy - 1 mıllıard 250 myń teńge.

Bul joba iske qosylǵannan keıin eski kólik ıeleri temir tulparlaryn tapsyryp, 150 myń teńgege deıin ótemaqy ala alady.

Qazirgi kezde «ÓKM Operatory» JShS QR Energetıka mınıstrligi jáne «Atameken» UKP-men birlese jobany iske asyrý sharttaryn pysyqtap jatyr, oǵan sáıkes atalǵan qatty turmystyq qaldyq (QTQ) tizimin jınaý jáne qaıta óńdeý boıynsha kásiporyndar aqshalaı ótemaqy alatyn bolady.

Baǵdarlamaǵa qatysýdyń mindetti sharty - jınaýdy, qaıta óńdeýdi jáne kádege jaratýdy júzege asyrýǵa qýatty bolýy kerek. Jobaǵa qatysýǵa úmitkerler QR aýmaǵynda óziniń qyzmetin júzege asyrýǵa mindetti, kásiporyndar ekologııalyq normaǵa jáne tehnologııalyq standarttarǵa sáıkes bolýy tıis.

Atalǵan is-sharany iske asyrý úshin jumys tobynyń sheshimi boıynsha ÓKM taralatyn taýarlardyń tizimi keńeıtiledi. Atap aıtqanda, tizimge tómendegiler engiziledi: quty, elektr, elektrondyq jabdyqtar (lıýmınestsentti jáne synapty shamdardy, sondaı-aq batareıalardy qosa alǵanda). Bul rette kádege jaratý alymy taýardyń belgilengen túrlerin óndirýshilerden jáne ımporttaýshylardan kádege jaratý ınfraqurylymy qalyptasqanǵa deıin alynbaıdy. 2016-2017 jyldary ishinde kádege jaratý tóleminiń mólsherlemesi «0» teńgeni quraıdy.

Sonymen qatar joba aıasynda jumys toby Qazaqstannyń iri qalalarynda qaldyqtardyń atalǵan túrlerin bólek jınaýdy engizýdi usyndy. Bul maqsatqa «ÓKM Operatory» JShS tutas jáne jelilik lıýmınestsentti shamdardy, synapty termometrdi, sondaı-aq batareıalardy jınaý úshin 500-ge jýyq konteınerler satyp alýdy josparlaýda.

Baǵdarlamanyń artyqshylyqtaryna tómendegiler jatady: batareıalar, elektr jáne elektrondyq jabdyqtar sekildi qaýipti qaldyqtardyń polıgondarǵa tııýin boldyrmaý, QTQ kómýdiń kólemin azaıtý, ekologııalyq ál-aýqatty jaqsartý, taýar óndirýshilerdi qaıtalama shıkizatpen qamtamasyz etý.

Budan basqa, ázirleýshiler jobany iske asyrý jańa qýatty jasaý jáne Qazaqstanda qaldyqtardy qaıta óńdeıtin salalardy aldaǵy ýaqytta damytý salasynda shaǵyn jáne orta bıznesti qoldaýǵa múmkindik beredi dep esepteıdi.

Belgilengen maqsattarǵa jetý bıznestiń áleýmettik jaýapkershiligi, sondaı-aq memleket pen bıznestiń qarym-qatynasyn nyǵaıtý jóninde Qazaqstan Respýblıkasy Prezıdentiniń tapsyrmasyn oryndaýǵa mańyzdy qadam bolyp tabylady.

Qaldyqtardyń atalǵan túrlerin órkenıetti kádege jaratý ótkiziletin is-sharalardyń tartymdylyǵyn jáne nátıjeliligin arttyrýǵa múmkindik beredi.